Grabitje spektakolare në Gjermani, vidhen 30 milionë euro në një bankë, hajdutët hapën me forcë 3 mijë kasaforta klientësh

Një grabitje e organizuar deri në detaje, e denjë për skenarët e Hollywood-it, ka tronditur qytetin perëndimor të Gelsenkirchen në Gjermani. Policia vendase raporton se autorë ende të paidentifikuar kanë arritur të vjedhin një shumë që vlerësohet paraprakisht rreth 30 milionë euro, pasi kanë hyrë në dhomën e sigurisë së lartë të një banke “Sparkasse”.

Zëdhënësi i policisë e përshkroi vjedhjen si “tejet profesionale”, duke theksuar se autorët kishin njohuri të brendshme dhe kishin kryer një planifikim të gjerë përpara se të godisnin.

Shpimi i murit të blinduar

Sipas hetuesve, grabitësit kanë shfrytëzuar garazhin e parkimit të ndërtesës për t’iu afruar objektivit. Duke përdorur një shpuese industriale të madhe, ata kanë hapur një vrimë në murin e betonit të kasafortës qendrore.

Sapo kanë hyrë brenda, ata kanë hapur me forcë më shumë se 3,000 kasaforta individuale (kuti sigurie), të cilat përmbanin para të gatshme, bizhuteri dhe ar. Alarmet e zjarrit u aktivizuan vetëm të hënën, kur autorët tashmë ishin larguar.

Arratisja me “Audi RS 6”

Dëshmitarët kanë deklaruar për policinë se kanë parë disa persona të maskuar duke transportuar çanta të mëdha drejt shkallëve të garazhit në orët e para të mëngjesit. Kamerat e sigurisë kanë fiksuar një automjet të fuqishëm, tip “Audi RS 6” me ngjyrë të zezë, duke dalë nga garazhi.

Nga verifikimet e para, rezulton se targat e automjetit ishin vjedhur më herët në qytetin e Hanoverit, çka tregon për një operacion të mirëmenduar logjistik.

Dëshpërimi i klientëve

Lajmi ka shkaktuar kaos dhe protesta para degës së bankës. Qindra klientë janë mbledhur duke kërkuar shpjegime për fatin e kursimeve të tyre.

Gazeta “Kölner Stadt-Anzeiger” raporton se një pjesë e madhe e të dëmtuarve janë klientë me origjinë turke, të cilët tradicionalisht ruajnë ar dhe stoli me vlerë në kasaforta bankare.

Policia vlerëson se dëmi total është rreth 30 milionë euro, bazuar në një mesatare të siguruar prej 10,000 eurosh për kuti. Megjithatë, shumë viktima kanë deklaruar se vlera reale e aseteve të humbura e tejkalon shumë këtë shumë të siguruar, duke e bërë këtë një nga grabitjet më të mëdha të viteve të fundit në Gjermani.

/rtsh.al/