Hoxha telefonatë me homologun e Katarit: Mirënjohje për kujdesin e treguar ndaj shqiptarëve gjatë sulmeve të Iranit
Ministri për Evropën dhe Punët e Jashtme, Ferit Hoxha ka zhvilluar një bisedë telefonike me homologune tij të Katarit, Soltan bin Saad Al-Muraikhi:
Përmes një postimi në X, Hoxha shprehet se, qeveria shqiptare i është mirënjohëse Katarit për kujdesin dhe mbështetjen e treguar ndaj qytetarëve shqiptarë gjatë këtyre kohëve sfiduese.
“Pata sot një bisedë shumë të frytshme me Ministrin e Shtetit për Punët e Jashtme të #Katarit, Sh.T. Soltan bin Saad Al-Muraikhi.
Dënova me forcë sulmet iraniane ndaj shtetit të Katarit, si një shkelje e qartë e së drejtës ndërkombëtare, si dhe e sovranitetit dhe integritetit territorial të tij.
Duke rikonfirmuar solidaritetin e palëkundur të Shqipërisë, shpreha gjithashtu vlerësimin për rolin udhëheqës të Katarit dhe për angazhimin e tij të vazhdueshëm për dialogun, ndërmjetësimin dhe stabilitetin rajonal.
Shqipëria vlerëson miqësinë e ngushtë me Katarin dhe mbetet e gatshme të mbështesë çdo nismë që synon ruajtjen e paqes dhe stabilitetit në rajon dhe më gjerë.
Jemi njëkohësisht mirënjohës ndaj autoriteteve të Katarit për kujdesin dhe mbështetjen e treguar ndaj qytetarëve shqiptarë në Katar gjatë këtyre kohëve sfiduese“, shkruan Hoxha në postimin e tij.
