KIEV – Zelensky i kërkon NATO-s më shumë raketa dhe municione

KIEV, 18 qershor /ATSH-AFP/ – Presidenti ukrainas, Volodymyr Zelensky u bëri thirrje sot vendeve të NATO-s të shtojnë furnizimet me raketa kundërbalistike, municione artilerie dhe dronë tokësorë për të ndihmuar Ukrainën të përballojë sulmet e vazhdueshme ruse.

Duke folur në selinë e NATO-s në Bruksel, Zelensky theksoi se Ukraina po përballet pothuajse çdo natë me qindra dronë dhe raketa ruse, duke e bërë jetike forcimin e mbrojtjes ajrore.

“Ne të gjithë e shohim se presidenti Vladimir Putin po mbështetet tani në sulme të vazhdueshme me raketa. Ai ka raketa balistike, ndaj ne kemi nevojë për kapacitete kundërbalistike”, deklaroi presidenti ukrainas.

Aleatët po e mbështesin Kievin përmes programit PURL, i cili parashikon blerjen e armëve amerikane me financim evropian.

Programi përfshin edhe sigurimin e raketave interceptuese “Patriot”, të konsideruara thelbësore për neutralizimin e raketave balistike ruse.

Presidenti Zelensky tha se disa vende kanë përgatitur tashmë kontribute të reja për këtë program, por kërkoi që vendimet të zbatohen sa më shpejt.

“Rusia sulmon Ukrainën çdo ditë, ndaj ju lutem mos shtyni as edhe një ditë atë që mund të bëhet sot”, u shpreh ai para Grupit të Kontaktit për Mbrojtjen e Ukrainës, i bashkëkryesuar nga Britania e Madhe dhe Gjermania.

Së fundmi, Gjermania, Suedia dhe Holandës kanë njoftuar synimin për të financuar dy paketa të reja ndihme në kuadër të programit, me një vlerë totale prej rreth 1 miliard dollarësh.

Presidenti ukrainas kërkoi gjithashtu më shumë dronë tokësorë dhe municione për artilerinë me rreze të gjatë veprimi, duke theksuar se kapacitetet aktuale të prodhimit në Evropë dhe furnizimet që merr ushtria ukrainase nuk janë të mjaftueshme për nevojat në front./  /Ad.Ab./ a.jor.