KOMENT – Zelensky midis Moskës dhe Uashingtonit: Lufta, presionet dhe vendosmëria e një kombi të lodhur

NJU JORK, 24 shkurt /ATSH/- Katër vjet pas fillimit të pushtimit të plotë rus, Ukraina qëndron e palëkundur, por lodhja e popullit është e dukshme, sipas “NBC News”.

Përpjekjet fillestare të Moskës për të rrëzuar presidentin Volodymyr Zelensky dhe për të “gllabëruar” vendin fqinj duket se kanë dështuar, por çështjet kryesore të negociatave të paqes mbeten të pazgjidhura.

Katër vjet pas pushtimit rus, progresi mbi çështjet kyçe duket i ngadalshëm dhe i paqartë. Tonet e fundit të presidentit ukrainas tregojnë një kombinim të qartë të vendosmërisë dhe zemërimit te thellë.

“Nuk më duhen histori për të mbyllur këtë luftë dhe për të shkuar në diplomaci”, shkroi Zelenskyy në X javën e kaluar, duke iu referuar dukshëm Vladimir Medinsky, negociatorit kryesor rus.

Mesazhi ishte i qartë: pretendimet historike të Kremlinit, që pretendojnë pjesë të Ukrainës si territor rus, nuk do të jenë asnjëherë baza për kompromis.

Kremlini, nga ana e tij, nuk ka treguar asnjë shenjë dobësie. Përkundrazi, ai qëndron i palëkundur lidhur me kërkesat e veta dhe legjitimitetin e luftës, duke e quajtur pushtimin një “operacion special ushtarak” dhe duke insistuar se qëllimet e tij nuk janë arritur ende.

Në katër vitet e fundit, Rusia kontrollon rreth 20% të territorit ukrainas, duke u përfshirë në një luftë shkatërruese që ka tejkaluar madje edhe rezistencën e Bashkimit Sovjetik kundër Nazistëve.

Humbjet njerëzore janë të frikshme. Afro gjysmë milioni të vdekur dhe 1,5 milionë të plagosur ose të zhdukur – shifra që trondit ndërgjegjen globale.

Civilët paguajnë çmimin më të lartë: viti i kaluar ishte më vdekjeprurësi për civilët që nga fillimi i pushtimit, dhe rreth 6 milionë ukrainas jetojnë jashtë vendit si refugjatë.

Për ata që qëndrojnë brenda vendit, jetesa është e papërballueshme; sulmet e vazhdueshme ndaj rrjeteve të energjisë, i kanë lënë qytetarët të përballen me të ftohtin në errësirë, në një nga dimrat më të ashpër të dekadës.

Në këtë skenë të vështirë, Zelensky përballet me një presion të dyfishtë: nga Moska për të pranuar humbje territoriale dhe nga Uashingtoni, ku presidenti amerikan, Donald Trump kërkon që Ukraina të bëjë lëshime në negociata për të arritur paqen.

Por, presidenti ukrainas duket i vendosur: ai refuzon të sakrifikojë dekada sakrificash për një kompromis të shpejtë.  Ai e di se çdo lëshim territorial do të minonte moralin e popullit dhe do të dëmtonte sovranitetin e vendit.

Çështja nuk është vetëm politike; ajo është edhe personale dhe njerëzore. Historia e qytetarëve, si Nataliia Sukhar nga Kharkivi, tregon çmimin e përditshëm të luftës.

Pas një udhëtimi 15-orësh me tren drejt Berlinit me djalin e saj 5-vjeçar, ajo u kthye në Ukrainë dhe tani jeton në rajonin perëndimor të Ivano-Frankivsk.

Por, entuziazmi fillestar është zbehur: “Zgjedhja është ose të dorëzojmë një të tretën e Ukrainës dhe të lejojmë agresorin të avancojë, ose të vazhdojmë luftën në kufijtë e fundit të mundësive tona njerëzore dhe ekonomike”, tha ajo.

Nga ana tjetër, Moska kërkon të gjithë rajonin lindor të Donbasit, pavarësisht se Ukraina ende mban nën kontroll pjesë të territorit atje.

Kjo ka krijuar një ngërç që vazhdon të shfaqë pasoja tragjike për të dy vendet.

Edhe pse disa rusë po shfaqin shqetësim mbi pasojat e luftës, Kremlini përpiqet të tregojë vendosmërinë e tij për të shkuar deri në fund, duke përfshirë dekorime shtetërore për ushtarët dhe ekspozita patriotike në Moskë.

Në Kiev, Zelensky përballet gjithashtu me sfida të brendshme: presion për të mbajtur zgjedhje të parakohshme, akuza mbi korrupsion dhe tensione brenda ushtrisë.

Ai ka bërë të qartë se është i gatshëm të përballet me luftën deri në fund, duke mos pranuar ultimatumet që kërkojnë dorëzimin e territoreve të Ukrainës.

Në këtë kontekst, Zelensky shfaqet si simbol i qëndresës dhe vendosmërie.

Por historia e tij është edhe historia e një kombi të lodhur, që përballet me zgjedhje të pamundura: të dorëzohet, të sakrifikojë tokë dhe njerëz, ose të vazhdojë një luftë të shkatërruar, me kosto të jashtëzakonshme.

Mes presioneve ndërkombëtare, humbjeve të mëdha njerëzore dhe shkatërrimit të vendit, Ukraina duket e vendosur të mos dorëzohet – një vendim që do të përcaktojë të ardhmen e saj për dekada.//a.i/