“La Repubblica”: BE: Putini po humbet, ne do t’i kapërcejmë vetot e Hungarisë

ROMË, 25 shkurt /ATSH/- Evropa dhe G7 rikonfirmuan mbështetjen për Ukrainën. Në përvjetorin e katërt të luftës ruse, aleatët e Kievit nuk po tërhiqen, dhe presidenti Volodymyr Zelensky theksoi me krenari se “Rusia nuk ka fituar”, sipas “La Repubblica”.

Ai shtoi se për ta ndaluar atë përfundimisht, pranimi i Ukrainës në Bashkimin Evropian deri në vitin 2027 mbetet thelbësor.

Kjo kërkesë ka shkaktuar pakënaqësi dhe detyruar presidenten e Komisionit Evropian, Ursula von der Leyen, dhe presidentin e Këshillit Evropian, António Costa, të sqarojnë se nuk mund të caktohet një afat i qartë.

“Rusia nuk ka arritur objektivat e saj ushtarake”, paralajmëruan udhëheqësit e BE-së.

“E paaftë të përparojë në fushën e betejës, ajo po synon qëllimisht infrastrukturën civile dhe atë të rëndësishme. Ukrainasit po tregojnë guxim, vendosmëri dhe qëndrueshmëri të jashtëzakonshme”, thanë ata.

Udhëheqësit e G7-ës – SHBA, Kanadaja, Japoni, Britania e Madhe, Gjermania, Franca dhe Italia – rikonfirmuan gjithashtu mbështetjen e tyre të palëkundur për Ukrainën, duke vlerësuar edhe përpjekjet e presidentit Trump për paqe.

Për BE-në, rikonfirmimi i mbështetjes për Kievin nënkupton kryesisht garantimin e një ndihme prej 90 miliardë eurosh, të dakordësuar nga Këshilli Evropian në dhjetor, por që aktualisht mbetet e bllokuar nga Hungaria.

“Më lejoni ta them qartë. Të 27 vendet kanë dhënë fjalën për këtë kredi. Ky premtim nuk mund të thyhet. Ne do ta sigurojmë ndihmën në një mënyrë apo tjetër dhe kemi disa opsione për ta bërë këtë”, tha Von der Leyen.

“Mbështetja ushtarake do të vazhdojë gjithashtu”, theksoi ajo.

“Është thelbësore të kemi një datë të qartë për pranimin në BE. Nëse nuk ka një datë, Putini do të gjejë mënyra për të bllokuar Ukrainën për dekada, duke e ndarë Evropën”, tha Zelensky duke bërë thirrje për një angazhim më të madh.

Sipas tij, Kremlini është “një diktaturë mendërisht e paqëndrueshme”, e prirur ndaj veprimeve të papritura dhe qëllimeve të dhunshme, dhe për këtë arsye shpreson që viti 2027 të shënojë hyrjen zyrtare të Ukrainës në Bashkimin Evropian.

“Megjithatë, udhëheqësit evropianë mbeten të rezervuar. Nuk është e mundur të caktohen data”, tha Von der Leyen, ndërsa Costa siguroi se “e ardhmja e Ukrainës qëndron në BE.”

Parlamenti Evropian gjithashtu shprehu mbështetje për Ukrainën por votimi nuk ishte unanim.

“Ukraina ka nevojë për më shumë ndihmë. Një premtim ndihme nuk e ndalon luftën. Municionet janë të domosdoshme çdo ditë derisa të ndalohen masakrat”, tha sekretari i Përgjithshëm i NATO-s, Mark Rutte.

Në Evropë, Hungaria e Viktor Orban mbetet e vetmja që ka shprehur hapur mospajtim.

Qeveria hungareze vazhdon të refuzojë kredinë prej 90 miliardë eurosh dhe sanksionet e reja ndaj Moskës.

“Ukraina ka përdorur energjinë si armë, duke ndërhyrë në fushatën zgjedhore hungareze. Ne nuk do t’i nënshtrohemi presionit, as nga Ukraina dhe as nga institucionet e BE-së,” tha Hungaria, duke kërkuar rikthimin e tubacionit “Druzhba”, që transporton naftën ruse në vend. //a.i/