Lufta në Iran / Donald Trump kritikoi udhëheqjen britanike, reagon kryeministri Starmer

Keir Starmer deklaroi se Mbretëria e Bashkuar duhet të veprojë me qetësi dhe vendosmëri përballë rrezikut të përshkallëzimit të konfliktit në Lindjen e Mesme, duke pranuar shqetësimin në rritje të opinionit publik.

Gjatë fjalës së tij në parlament, Starmer theksoi: “E di që i gjithë vendi është i shqetësuar për mundësinë e një përshkallëzimi”, dhe shtoi se reagimi i Britanisë duhet të karakterizohet nga “qartësia, vendosmëria dhe qetësia”.

Deklaratat e tij erdhën pasi presidenti amerikan kritikoi sërish udhëheqjen britanike për atë që e cilësoi si mbështetje të kufizuar të Londrës ndaj sulmeve amerikane kundër Iranit.

Starmer bëri të ditur se Mbretëria e Bashkuar po bashkëpunon ngushtë me SHBA për përgatitjen e dislokimit të kapaciteteve ushtarake në rajon.

“Prej disa javësh po përgatitemi për të vendosur kapacitetet tona në zonë. Në këtë proces, po punojmë ngushtë me Shtetet e Bashkuara”, u shpreh ai.

Sipas kryeministrit, bashkëpunimi përfshin sisteme të mbrojtjes ajrore, sisteme kundër dronëve dhe avionë luftarakë F-35.

Starmer nënvizoi se bashkëpunimi ushtarak mes Londrës dhe Uashingtonit në Lindjen e Mesme është dëshmi konkrete e “marrëdhënies së veçantë” mes dy vendeve, përtej deklaratave të fundit kritike të Trump.

Duke iu përgjigjur pyetjeve nëse zhvillimet e fundit e kanë forcuar apo dobësuar raportin me Uashingtonin, ai tha:

“Avionë amerikanë operojnë nga baza britanike — kjo është marrëdhënia e veçantë në veprim. Avionë britanikë rrëzojnë dronë dhe raketa për të mbrojtur jetën e amerikanëve në Lindjen e Mesme, në bazat tona të përbashkëta — kjo është marrëdhënia e veçantë në veprim. Ne ndajmë informacione të inteligjencës çdo ditë për të mbajtur njerëzit tanë të sigurt. Kjo është marrëdhënia e veçantë në veprim.”

Ai përfundoi duke theksuar se përqendrimi te çdo deklaratë e fundit e presidentit Trump nuk pasqyron thelbin e marrëdhënies strategjike mes dy vendeve.