Mbi 600 dronë drejt Moskës, Rusia thotë se rrëzoi 180 prej tyre

Një sulm masiv me dronë ka goditur gjatë natës Moskën dhe zonat përreth saj, në një prej ofensivave më të mëdha ajrore të Ukrainës ndaj kryeqytetit rus.

Kryebashkiaku i Moskës, Sergei Sobyanin, deklaroi se 620 dronë u drejtuan drejt rajonit të Moskës nga mbrëmja e së hënës deri në orët e para të mëngjesit të së martës. Sipas tij, 180 prej tyre u shkatërruan nga mbrojtja ajrore ruse. Shifrat e autoriteteve ruse nuk janë verifikuar në mënyrë të pavarur.

Sulmi shkaktoi dëme në disa objekte dhe plagosi të paktën tre persona, mes tyre një vajzë 10-vjeçare. Guvernatori i rajonit të Moskës, Andrei Vorobyov, tha se pasojat më të rënda u regjistruan në zonën e Pavlovsky Posad, ku një banesë u përfshi nga zjarri. Dëme u raportuan edhe në banesa të tjera dhe në një objekt magazinimi të kompanisë ruse të tregtisë online Wildberries.

Sulmi solli edhe kufizime në trafikun ajror. Autoritetet ruse vendosën përkohësisht kufizime në operimin e aeroporteve të Moskës, ndërsa ekipet e emergjencës u angazhuan në zonat ku ranë mbetjet e dronëve të interceptuar.

Të dyja palët kanë intensifikuar përdorimin e dronëve për goditje larg vijës së frontit, duke synuar objektiva ushtarake, logjistike dhe infrastrukturore.

Sulmi ndaj Moskës vjen vetëm pak ditë pas një tjetër ofensive të madhe ukrainase me dronë ndaj territorit rus, ndërsa edhe Rusia ka vijuar sulmet ajrore ndaj qyteteve dhe infrastrukturës ukrainase.

/rtsh.al/