Mbrëmje poetike në Teatrin e Korçës, një udhëtim artistik përmes vargjeve të autores Valbona Lola

Në teatrin “Andon Zako Çajupi” u mbajt mbrëmja poetike “Fajet e Zemrës”, një udhëtim artistik përmes vargjeve të autores Valbona Lola.

Poezitë e përzgjedhura nga vëllimi i saj i fundit, tekste që flasin për jetën, përditshmërinë, dashurinë, prindërit dhe natyrën, morën jetë falë interpretimit të disa prej aktorëve më të dashur të skenës: Luiza Xhuvani, Alfred Trebicka, Zamira Kita, Violeta Banushi dhe Blerta Belliu.

Vetë autorja Valbona Lola u shpreh se kjo mbrëmje ishte “një takim i zemrave”, ku poezia gjen rrugën drejt publikut përmes zërit të aktorëve.

“Sigurisht që mbizotëronin lirikat e dashurisë, pa harruar ato sociale dhe rebelimin tim kur shikoj që diçka nuk shkon ashtu siç duhet. Lirikat e peizazhit dhe disa lirika që i kushtohen Korçës”, tha Lola.

Ndërsa aktori Alfred Trebicka theksoi se poezia e Lolës sjell një sinqeritet të rrallë.

“Është një poezi qytetare, e ngrohtë, e brishtë, që prek ato elemente bazike të shoqërisë apo qenies njerëzore”, tha Trebicka.

Mbrëmja poetike “Fajet e Zemrës” erdhi për publikun korçar si pjesë e kalendarit festiv të fundvitit.

Gazetare: E. Fili    

/rtsh.al/