Mijëra qytetarë mblidhen në protestën e nëntë kundër qeverisë

Mijëra qytetarë janë mbledhur këtë të hene serish  në bulevardin “Dëshmorët e Kombit” në protestën e nëntë radhazi kundër qeverisë, duke shprehur pakënaqësinë e tyre ndaj politikave qeveritare dhe duke kërkuar ndryshime të thella në mënyrën e qeverisjes së vendit.

Tubimi, i organizuar para Kryeministrisë, ka mbledhur qytetarë nga zona të ndryshme të vendit, të cilët kanë protestuar me pankarta dhe thirrje kundër korrupsionit, mungesës së transparencës dhe politikave që, sipas tyre, favorizojnë një grup të ngushtë interesash në kurriz të shumicës së qytetarëve.

Gjatë protestës, pjesëmarrësit kanë kërkuar më shumë llogaridhënie nga institucionet, mbrojtje të pasurive publike dhe politika që nxisin konkurrencën e ndershme dhe zhvillimin ekonomik.

Në tubim kanë marrë pjesë edhe përfaqësues të opozitës, të cilët kanë mbështetur kërkesat e qytetarëve dhe kanë bërë thirrje për vijimin e reagimit qytetar ndaj asaj që e konsiderojnë si një model të dështuar qeverisjeje.

Organizatorët kanë deklaruar se protestat do të vijojnë edhe në ditët në vijim, duke theksuar se synimi i tyre është sensibilizimi i opinionit publik dhe ushtrimi i presionit qytetar për ndryshime konkrete.

Deri tani, protesta është zhvilluar pa incidente të raportuara, ndërsa forca të shumta policie kanë qenë të pranishme në zonë për të garantuar mbarëvajtjen e tubimit.