Muzikë mbi normat e lejuara, gjobë administratorit të lokalit në Shkodër

TIRANË, 25 gusht /ATSH/ Administratori i një lokali në në lagjen “Vasil Shanto”, në Shkodër është ndëshkuar me masë administrative 200 000 lekë të rinj, pasi prishi qetësinë publike duke vënë muzikë mbi normat e lejuara

Në kuadër të masave të shtuara për ruajtjen e qetësisë publike dhe për mbrojtjen nga ndotja akustike në zonat turistike, bazuar dhe në telefonatat e qytetarëve, strukturat e DVP Shkodër kanë intensifikuar, monitorimet në subjektet që zhvillojnë veprimtari me muzikë të lartë.

Shërbimet e Komisariatit të Policisë Shkodër, pasi morën njoftim nga salla operative per një ankesë për muzikë të lartë në lagjen “Vasil Shanto”, konstatuan se niveli i muzikës i tejkalonte kufijtë e lejuar me ligj. Në përfundim, ndaj administratorit të këtij subjekti, shtetasit M. L., u vendos masë administrative me vlerë 200 000 lekë.

Drejtoria Vendore e Policisë Shkodër i bën thirrje të gjithë personave fizikë dhe juridikë që të respektojnë nivelin dhe orarin e lejuar për muzikën që gjenerojnë nga aktivitetet në subjektet e tyre.

/gj.m/j.p/