Përmbytjet në Indonezi, rritet bilanci i viktimave, vijojnë kërkimet për të zhdukurit
Më shumë se 400 persona kanë humbur jetën dhe qindra të tjerë janë plagosur nga përmbytjet katastrofike që goditën Indonezinë javën e kaluar, si pasojë e shirave ciklonikë të sjellë nga Cikloni Senyar. Ekipet e shpëtimit po punojnë pa ndërprerë për të arritur në zonat më të izoluara të ishullit Sumatra, ku mijëra banorë kanë mbetur pa ushqime, ujë dhe ndihma bazë.
Sipas autoriteteve, situata në Sumatrën Veriore është ndër më kritiket, mbi 200 viktima, ndërsa rreth 200 të tjerë rezultojnë të zhdukur. Presidenti indonezian Prabowo Subianto vizitoi zonat e prekura, duke inspektuar pikat e evakuimit dhe kuzhinat publike të ngritura për të ndihmuar banorët e goditur rëndë.
Por katastrofa nuk është e kufizuar vetëm në Indonezi. Cikloni Senyar dhe sistemet e tjera tropikale kanë goditur një sërë vendesh të Azisë Jugore dhe Juglindore.
Në Sri Lanka, Cikloni Ditwah shkaktoi përmbytje masive dhe rrëshqitje toke, duke vrarë mbi 330 persona. Presidentja Anura Kumara Dissanayake e cilësoi situatën si “katastrofa natyrore më sfiduese” që ka përjetuar vendi.
Stuhitë e fuqishme dhe shirat e rrëmbyeshëm gjatë këtij muaji kanë prekur miliona njerëz në mbarë rajonin, duke çuar numrin e viktimave në më shumë se 900 në të gjithë Azinë.
Autoritetet paralajmërojnë se rreziku vazhdon, ndërsa përpjekjet e kërkim-shpëtimit vijojnë mes terrenit të vështirë, infrastrukturës së dëmtuar dhe kushteve ende të paqëndrueshme atmosferike.
/rtsh.al/