Përplasja diplomatike Gjermani-SHBA, Klingbeil i kundërpërgjigjet Trumpit për “rrëmujën” në Iran
Zëvendëskancelari gjerman, Lars Klingbeil, ka shpërthyer në kritika të ashpra ndaj Presidentit të SHBA-së, Donald Trump, duke deklaruar se Berlini zyrtar “nuk ka nevojë për këshilla” nga Uashingtoni lidhur me krizën në Iran. Gjatë një fjalimi në aktivitetet e Ditës së Punës në rajonin e Ruhr-it, Klingbeil e mbajti Trumpin përgjegjës për “rrëmujën” globale dhe pasojat ekonomike që po rëndojnë mbi konsumatorët.
Mbështetje për Merz
Edhe pse vijnë nga kampe të ndryshme politike, socialdemokrati Klingbeil doli fuqishëm në mbrojtje të Kancelarit konservator Friedrich Merz, i cili u sulmua ashpër nga Trump në mediat sociale.
“Nuk kemi nevojë për ndonjë këshillë nga Donald Trump tani për tani. Ai duhet ta shohë rrëmujën që ka shkaktuar. Duhet të sigurohet që po zhvillohen bisedime serioze për paqe,” deklaroi prerë Klingbeil para pjesëmarrësve në Bergkamen.
Pika e konfliktit “poshtërimi” i Uashingtonit
Tensioni nisi kur Kancelari Merz deklaroi se Teherani po e “poshtëronte” Uashingtonin në negociata dhe se SHBA-ja hyri në këtë luftë pa një strategji të qartë. Kjo deklaratë nxiti një reagim tipik agresiv nga Trump, i cili akuzoi Merz-in se “nuk ka idenë se për çfarë flet” dhe i kërkoi të merret me “vendin e tij të shkatërruar”, duke cituar krizën e imigracionit dhe energjisë në Gjermani.
Paralajmërimi për pavarësinë e Evropës
Zëvendëskancelari Klingbeil vuri në dyshim gjykimin strategjik të Trumpit, duke argumentuar se Shtëpia e Bardhë ka nënvlerësuar kohëzgjatjen e konfliktit.
Klingbeil sugjeroi se Trump besonte se konflikti do të zgjidhej brenda “dy ose tre ditëve”.
Ai theksoi domosdoshmërinë që Evropa të jetë mjaftueshëm e fortë ekonomikisht për të mos u shantazhuar.
“Nuk dua që të jemi të varur nga gjendja shpirtërore e Donald Trump sot ose nesër,” shtoi ai.
Kërcënimet e Trumpit
Në dritën e këtyre tensioneve, Presidenti Trump ka përshkallëzuar retorikën duke kërcënuar me reduktimin e prezencës ushtarake amerikane në Gjermani. Ndërkohë që çmimet e karburantit po rriten ndjeshëm si pasojë e luftës, Berlini zyrtar duket se ka vendosur të mbajë një qëndrim më sfidues ndaj aleatit të tij tradicional, duke kërkuar llogari për dëmet ekonomike që po pëson tregu evropian.
/rtsh.al/