Po transportonin 4 emigrantë të paligjshëm kundrejt parave, arrestohen në Gjirokastër 2 të rinj nga Bulqiza! S'ju bindën urdhrit të Policisë për të ndaluar ( VIDEO)

Dy 20-vjeçarë nga Bulqiza kanë rënë në prangat e Policisë në Gjirokastër, pasi u kapën duke transportuar kundrejt pagesës 4 emigrantë që kishin hyrë në mënyrë të paligjshme në territorin shqiptar, përmes kufirit me Greqinë.

Përmes një njoftimi, Policia bën të ditur se në cilësinë e provës materiale u sekuestrua automjeti me të cilin po transportoheshin emigrantët dhe 2 celularë. Gjatë ndjekjes, sipas Policisë të rinjtë nuk iu bindën urdhrit për të ndaluar.

Materialet procedurale iu referuan Prokurorisë së Gjirokastrës, për veprimet e mëtejshme, për veprat penale “Ndihma për kalim të paligjshëm të kufirit” dhe “Mosbindja ndaj urdhrit të punonjësit të Policisë”.

Njoftimi i Policisë:

DVP Gjirokastër-Finalizohet operacioni policor i koduar “Long Wait”.

U kapën në flagrancë duke transportuar, kundrejt fitimit, 4 emigrantë, të cilët kishin hyrë në mënyrë të paligjshme në territorin shqiptar, nëpërmjet kufirit me Greqinë, vihen në pranga 2 shtetas.

Sekuestrohen 1 automjet dhe 2 aparate celularë.

Specialistët për Hetimin e Trafiqeve të Paligjshme, në bashkëpunim me Sektorin Operacional në DVP Gjirokastër dhe shërbimet e Komisariatit të Policisë Tepelenë, në vijim të punës për goditjen e veprimtarisë kriminale të dhënies ndihmë shtetasve të huaj, kundrejt fitimit, për kalim të paligjshëm të kufirit, kanë finalizuar operacionin policor të koduar “Long Wait”, si rezultat i të cilit u arrestuan shtetasit:

L. A., 20 vjeç, dhe L. B., 20 vjeç, të dy banues në Bulqizë.

Këta shtetas u kapën në flagrancë nga shërbimet e Policisë, në aksin rrugor “Gjirokastër-Tepelenë”, në vendin e quajtur “Uji i Ftohtë”, duke transportuar me automjetin tip “Volkswagen”, kundrejt fitimit, 4 emigrantë, të cilët kishin hyrë në mënyrë të paligjshme në territorin shqiptar, nëpërmjet kufirit me Greqinë, si dhe nuk iu bindën urdhrit të punonjësve të Policisë për të ndaluar.

Në cilësinë e provës materiale u sekuestruan automjeti dhe 2 aparate celularë.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprimet e mëtejshme, për veprat penale “Ndihma për kalim të paligjshëm të kufirit” dhe “Mosbindja ndaj urdhrit të punonjësit të Policisë”.