Projektet kërkimore në Universitetin e Korçës – Forcohet bashkëpunimi me Agjencinë Kombëtare të Kërkimit Shkencor dhe Inovacionit

Bashkëpunimi i Universitetit “Fan Noli” në Korçë me Agjencinë Kombëtare të Kërkimit Shkencor dhe Inovacionit është forcuar nga viti në vit, duke krijuar më shumë mundësi për zhvillimin e projekteve kërkimore.

Pedagogët dhe stafi i universitetit i janë përgjigjur vazhdimisht thirrjeve për aplikime, të mbështetur edhe nga kualifikimi i tyre i vazhdueshëm profesional.

Aktualisht janë mbyllur aplikimet e këtij viti për projektet e infrastrukturës në kërkimin shkencor, ku Universiteti i Korçës ka dorëzuar disa aplikime për ndërtimin e laboratorëve.

“Vlen të përmendin projekte që kanë qenë në fushën e shkencave sociale dhe humane, në fushën e arsimit apo metodologjive të mësim dhënies. Kemi aplikuar në projekte që kanë qenë në fushën e shkencave sociale apo edhe atyre mjedisore. Janë projekte që kanë sjellë inovacion apo laborator që për nga cilësia mund të krahasohen me laborator bashkëkohore”, u shpreh Dr.Aida Mosko, Zv/Rektore për Shkencën dhe Projektet.

Universiteti i Korçës disponon disa laboratorë kërkimorë, një prej të cilëve është ngritur falë projekteve të mbështetura nga AKSHI, i fokusuar në kërkimet mbi ushqimin dhe përdorimin e metodave të avancuara për analizën e tij.

Gazetare: E. Fili    

/rtsh.al/