Rich Paul zbulon pa dashje statusin e marrëdhënies me Adele? Menaxheri i njohur i drejtohet këngëtares si “gruaja ime”
Rich Paul ka rikthyer në qendër të vëmendjes thashethemet për një martesë të mundshme të fshehtë me këngëtaren Adele, pasi gjatë një bisede të fundit iu referua asaj si “gruaja ime”.
Menaxheri i njohur i sportistëve u shfaq së fundmi në një video të publikuar nga Media Haus Co., ku aktori dhe krijuesi i përmbajtjes Rel Tate e sfidoi të zgjidhte një fjalëkryq brenda 60 sekondave.
“60 sekonda nuk janë të mjaftueshme. Po e vini në dyshim inteligjencën time?”, u shpreh me humor Rich Paul, duke treguar njëfarë shqetësimi për sfidën.
Gjatë bisedës, Tate e pyeti se kur kishte qenë hera e fundit që ishte marrë me fjalëkryqe. Përgjigjja e Paul ishte ajo që tërhoqi vëmendjen dhe nxiti spekulimet për statusin e marrëdhënies së tij me Adele-n.
“Shoku, ka kaluar shumë kohë. Por gruaja ime e bën çdo mëngjes”, u përgjigj ai, duke iu referuar këngëtares si bashkëshortja e tij.
Rich Paul, 45 vjeç, dhe Adele, 38 vjeçe, janë në një lidhje që prej vitit 2021. Ata u fotografuan për herë të parë së bashku gjatë një ndeshjeje të NBA-së dhe që prej asaj kohe janë shfaqur shpesh në publik si çift.
Në vitin 2024, ata konfirmuan fejesën, ndërsa Adele la të kuptohej se ishte gati të hidhte hapin e radhës gjatë një koncerti në Mynih të Gjermanisë.
Gjatë performancës, një fanse nga publiku i propozoi me shaka këngëtares, e cila iu përgjigj: “Nuk mund të martohem me ty, sepse tashmë do të martohem”.
Që prej atij momenti, Adele ka nxitur vazhdimisht dyshimet se mund të jetë martuar me Rich Paul, pasi në disa raste i është referuar atij publikisht si “burri im”.
Megjithatë, as këngëtarja dhe as partneri i saj nuk kanë konfirmuar zyrtarisht se kanë zhvilluar një ceremoni martesore. Kjo ka bërë që çdo deklaratë e tyre që lë të kuptohet për një martesë të mundshme të tërheqë vëmendjen e fansave dhe mediave.
Për momentin, mbetet e paqartë nëse Adele dhe Rich Paul e kanë kurorëzuar lidhjen e tyre në fshehtësi apo nëse thjesht përdorin këto terma për t’iu referuar njëri-tjetrit.