Rritet përdorimi i shërbimeve publike online, 87% e shqiptarëve përdorin internetin
TIRANË, 11 dhjetor/ATSH/ Përdorimi i internetit dhe i shërbimeve digjitale nga qytetarët shqiptarë po rritet ndjeshëm, sipas Anketës Kombëtare mbi Përdorimin e Teknologjisë së Informacionit dhe Komunikimit (TIK) në familje dhe individë.
Në grupmoshën 16-74 vjeç, 87,2% e individëve përdorin internetin, nga të cilët 97,3% e përdorin disa herë gjatë ditës.
Përdorimi kryesor realizohet përmes telefonave smart (99,9%), ndërsa laptopët dhe kompjuterët desktop zënë përkatësisht 41,2% dhe 20,9%.
Shërbimet e qeverisjes elektronike po përdoren gjerësisht.
Në vitin 2025, 99,5% e qytetarëve kanë një llogari në platformën e-Albania, duke u lehtësuar aksesin tek dokumente zyrtare si letërnjoftimi dhe certifikatat e lindjes, informacione mbi përfitimet sociale, detyrimet tatimore, si dhe shërbime arsimore dhe shëndetësore publike.
Marrja e informacionit nga faqet ose aplikacionet e internetit ka shënuar rritje me 2,2 pikë përqindje, ndërsa shkarkimi ose printimi i formularëve zyrtarë është rritur me 0,5 pikë përqindje krahasuar me vitin 2024.
/a.f/