SHBA – Trump kërcënon Brazilin me tarifë 50% dhe kërkon që gjyqi i Bolsonaros të ndërpritet
UASHINGTON, 10 korrik /ATSH/ – Presidenti i SHBA-së, Donald Trump, tha se po planifikonte të vendoste një taksë prej 50% për mallrat e prodhuara në Brazil, duke përshkallëzuar luftën e tij me vendin e Amerikës së Jugut, sipas BBC.
Ai e njoftoi planin në letrën e tij të fundit për tarifat, e cila u nda në mediat sociale.
Në të, Trump akuzon Brazilin për “sulme” ndaj kompanive të teknologjisë amerikane dhe për kryerjen e një “gjueti shtrigash” kundër ish-presidentit të ekstremit të djathtë Jair Bolsonaro, i cili po përballet me ndjekje penale për rolin e tij të dyshuar në një komplot për të përmbysur zgjedhjet e vitit 2022.
Duke iu përgjigjur në një postim në mediat sociale, presidenti brazilian Luiz Inácio Lula da Silva tha se një rritje e tarifave ndaj Brazilit do të ishte reciproke dhe paralajmëroi kundër çdo ndërhyrjeje në sistemin gjyqësor të vendit.
Trump gjithashtu debatoi me Lulën në lidhje me gjyqin e Bolsonaros më parë këtë javë.
Në atë kohë, Lula tha se Brazili nuk do të pranonte “ndërhyrje” nga askush dhe shtoi se “askush nuk është mbi ligjin”.
Gjithashtu të mërkurën, Trump tha se një tarifë prej 50% mbi importet e bakrit, të cilën e njoftoi më parë këtë javë, do të hyjë në fuqi më 1 gusht.
Ai tha në një postim në rrjetet sociale se vendimi u mor për shkak të shqetësimeve për sigurinë kombëtare./ a.jor.