FOKUS – Brazili kundërpërgjigjet ndaj tarifave amerikane, pasi Trump kërcënon me një taksë prej 50%
RIO DE ZHANEIRO, 10 korrik /ATSH/ – Presidenti brazilian, Luiz Inácio Lula da Silva ka thënë se është gati të kundërpërgjigjet ndaj çdo tarife të vendosur ndaj Brazilit nga Shtetet e Bashkuara, sipas BBC.
Lula iu përgjigj kërcënimit të djeshëm nga homologu i tij amerikan, Donald Trump, për të vendosur një taksë prej 50% mbi mallrat braziliane nga 1 gushti.
Në një letër, Trump përmendi trajtimin e Brazilit ndaj ish-presidentit Jair Bolsonaro si një shkak për rritjen e tarifave.
Bolsonaro është aktualisht në gjyq për dyshimin se është përpjekur të organizojë një grusht shteti kundër Lulës pasi u mund prej tij në zgjedhjet e vitit 2022.
Trump iu referua Bolsonaros si “një udhëheqës shumë i respektuar në të gjithë botën”.
“Ky gjyq nuk duhet të zhvillohet”, shkroi ai, duke i bërë thirrje Brazilit që të përfundojë menjëherë “gjuetinë e shtrigave” kundër ish-presidentit.
Mbështetja e Trump për Bolsonaron nuk vjen si surprizë pasi të dy presidentët janë konsideruar prej kohësh aleatë.
Kundërshtimi i Lulës mbështetet nga të dhënat e qeverisë amerikane, të cilat sugjerojnë se SHBA-të kishin një suficit tregtar mallrash me Brazilin prej 7,4 miliardë dollarësh në vitin 2024.
Brazili është partneri i 15-të më i madh tregtar i SHBA-së dhe ndër importet e saj kryesore nga SHBA-ja janë lëndët djegëse minerale, avionët dhe makineritë.
Nga ana e saj, SHBA-të importojnë gaz dhe naftë, hekur dhe kafe nga Brazili./ a.jor.