SHBA heq zyrtarisht bllokadën detare ndaj porteve iraniane, JD Vance mbron marrëveshjen nga kritikat

Ushtria e Shteteve të Bashkuara ka hequr zyrtarisht bllokadën ndaj anijeve iraniane, një vendim i marrë në kuadër të një marrëveshjeje të re. Masa u konfirmua të enjten përmes një njoftimi zyrtar nga Komanda Qendrore e SHBA-së (CENTCOM) dhe deklaratave të bëra për mediat nga zëvendëspresidenti JD Vance.

Sipas të dhënave të bëra publike nga Vance, të mërkurën u regjistrua kalimi i 12.5 milionë fuçive naftë përmes Ngushticës së Hormuzit. Lidhur me këtë zhvillim, ai sqaroi se ushtria amerikane ka lejuar “një duzinë anijesh në veri të kalojnë nëpër bllokadën tonë detare”.

Pavarësisht këtij vendimi, prania ushtarake amerikane në rajon nuk do të tërhiqet plotësisht. Komanda Qendrore e SHBA-së theksoi në njoftimin e saj se anijet e Marinës Amerikane “do të qëndrojnë në zonën e përgjithshme për t’u siguruar që të gjitha aspektet e marrëveshjes të respektohen, të zbatohen dhe të jenë në fuqi dhe efekt të plotë”. Aktualisht, në ujërat pranë Iranit, Marina Amerikane mban të dislokuara më shumë se një duzinë anijesh luftarake, ku përfshihen edhe dy aeroplanmbajtëse.

Reagimi ndaj kritikave të brendshme politike

Marrëveshja e re ka ngjallur reagime dhe kritika në radhët e disa ligjvënësve republikanë ndaj administratës dhe Presidentit Trump. I pyetur nga gazetarët lidhur me këto qëndrime, zëvendëspresidenti Vance u kërkoi zërave kritikë të “kenë pak besim tek presidenti i Shteteve të Bashkuara”.

Për të mbrojtur vendimin e marrë, Vance e cilësoi të pabazë skepticizmin mbi marrëveshjen.

“Ideja se ai do të arrijë një marrëveshje që është e keqe për popullin amerikan, është absurde”, deklaroi ai.

Në vijim, zëvendëspresidenti nënvizoi nevojën që administrata të angazhohet për t’ia shpjeguar detajet e këtij pakti opinionit publik.

“Mendoj se kur njerëzit të kuptojnë jo vetëm marrëveshjen, por edhe qëndrimin tonë negociues si vend, ata do ta kuptojnë se kjo është një gjë e shkëlqyer për popullin amerikan”, tha Vance, duke e mbyllur deklaratën e tij me theksin te komunikimi i vendimeve qeveritare: “Kjo është pjesë e punës sonë. Duhet të tregojmë historinë se çfarë do të thotë kjo për amerikanët.”

 /rtsh.al/