SHBA pezullon dialogun e planifikuar strategjik me Kosovën, shkak veprimet e qeverisë
PRISHTINË, 12 shtator/ATSH/ Shtetet e Bashkuara të Amerikës e kanë pezulluar për një kohë të pacaktuar dialogun e planifikuar strategjik me Kosovën.
Në një njoftim në rrjetet sociale, Ambasada e SHBA-së në Kosovë thekson se ky vendim vjen për shkak të shqetësimeve lidhur me veprimet e qeverisë në detyrë.
“Shtetet e Bashkuara kanë pezulluar pa afat dialogun strategjik të planifikuar me Kosovën për shkak të shqetësimeve për veprimet e qeverisë në detyrë që kanë rritur tensionet dhe paqëndrueshmërinë, duke kufizuar aftësinë e Shteteve të Bashkuara për të punuar produktivisht me Kosovën në prioritetet e përbashkëta”, thuhet në njoftimin zyrtar.
Ambasada thekson se SHBA mbetet e përkushtuar në avancimin e interesave të përbashkëta.
“Mbetemi të përkushtuar në avancimin e interesave të përbashkëta nga Shtetet e Bashkuara dhe populli i Kosovës. Marrëdhënia jonë me Kosovën bazohet në një qëllim të përbashkët: forcimin e paqes dhe stabilitetit si bazë për prosperitetin e ndërsjellë ekonomik. Fatkeqësisht, veprimet dhe deklaratat e fundit të kryeministrit në detyrë, Kurti kanë paraqitur sfida për progresin e bërë gjatë shumë viteve”, përfundon njoftimi i ambasadës së SHBA-së në Kosovë.
/Kosovapress/