Shefi i NATO-s, Mark Rutte: Ukraina duhet të jetë prioritet i Aleancës dhe jo Groenlanda

Sekretari i Përgjithshëm i NATO-s, Mark Rutte, deklaroi sot në Forumin Ekonomik Botëror në Davos se Ukraina, jo Groenlanda, duhet të jetë prioriteti kryesor i aleancës ushtarake.

“Për Groenlandën, duhet të sigurohemi që çështja të zgjidhet në mënyrë miqësore. Por çështja kryesore nuk është Groenlanda. Tani, çështja kryesore është Ukraina”, tha Rutte.

Rutte shprehu shqetësim se duke u fokusuar shumë te çështje të tjera, NATO mund të humbasë fokusin kryesor, atë për Ukrainën.

“Fokusi te Ukraina duhet të jetë prioriteti ynë numër një, pastaj mund të diskutojmë të gjitha çështjet, përfshirë Groenlandën. Por Ukraina vjen e para, sepse është vendimtare për sigurinë tonë evropiane dhe amerikane”, tha Rutte.

Ai paralajmëroi se grindjet publike mund të dëmtojnë përpjekjet diplomatike.

Ndërkohë, kryeministri kanadez Mark Carney (në fjalimin e tij dje në Davos) tha se Kanadaja qëndron “fort me Groenlandën dhe Danimarkën” dhe mbështet plotësisht të drejtën e tyre unike për të vendosur për të ardhmen e Groenlandës.

Ai theksoi investimet e mëdha të Kanadasë në mbrojtjen e Arktikut (radarë, nëndetëse, avionë, trupa tokësore) dhe bashkëpunimin me aleatët e NATO-s në veri.

Për Ukrainën, Carney tha se Kanadaja është një nga kontribuuesit më të mëdhenj për frymë banori dhe pjesë e “Koalicionit të Vullnetshëm”.

Ai paralajmëroi për një “krizë në rendin botëror” dhe fillimin e një “realiteti brutal” ku gjeopolitika mes fuqive të mëdha nuk ka kufizime.

/rtsh.al/