Shkoi në një ceremoni varrimi në Malësinë e Madhe dhe nuk u kthye, asnjë gjurmë prej 4 ditësh për 78-vjeçarin nga Lezha

Prej katër ditësh, familjarët e Lek Ndreshajt, 78 vjeç, me banim në Torovicë të Lezhës, kanë humbur çdo kontakt me të.

I moshuari u pa për herë të fundit më 9 qershor, rreth orës 13:07, teksa ndodhej në një ceremoni mortore në Malësinë e Madhe.

Që nga ai moment, ai nuk është parë më nga askush.

Djali i tij, Gëzim Leka, apelon për ndihmën e qytetarëve që mund të kenë informacion mbi vendndodhjen e të atit.

Ai thekson se familja nuk ka pasur asnjë konflikt me askënd dhe nuk kupton se përse i ati është larguar në mënyrë të pazakontë nga ceremonia. Sipas të afërmve, 78-vjeçari nuk ka pasur probleme të shëndetit mendor dhe sjellja e tij ka qenë normale, megjithëse gjatë varrimit kishte shfaqur shenja lodhjeje.

Policia e Malësisë së Madhe, në bashkëpunim me Bashkinë dhe banorët e zonës, kanë ndërmarrë kërkime intensive në territorin malor të Shkrelit, por deri më tani pa rezultat.

Familja u bën thirrje të gjithë qytetarëve që mund të kenë parë apo të kenë ndonjë informacion mbi Lek Ndreshajn, të kontaktojnë menjëherë familjen ose të njoftojnë autoritetet përkatëse.