Shpërthime në Dubai, mbetje dronësh iranianë shkaktojnë dëme në një qendër financiare

Dubai u trondit sot nga disa shpërthime, pasi mbeturinat e dronëve iranianë të kapur ranë mbi ndërtesa në zemër të lagjes financiare të qytetit. Tym i zi i dendur u ngrit mbi horizontin e Dubait herët në mëngjes, pas asaj që autoritetet fillimisht e përshkruan si një zjarr në një zonë industriale të qytetit-shtet. Më vonë, autoritetet e Dubait konfirmuan se incidenti shkaktoi vetëm dëme të vogla materiale dhe se nuk ka raportime për persona të lënduar.

Ngjarja ndodhi pranë Qendrës Ndërkombëtare të Financave të Dubait, në një kohë kur tensionet në rajon janë rritur ndjeshëm. Më herët gjatë kësaj jave, disa banka në Dubai kishin urdhëruar stafin të largohej nga zyrat, pas një kërcënimi nga Irani për të shënjestruar institucionet financiare amerikane dhe izraelite.

Ndërkohë, Iraku është shndërruar në një nga pikat kryesore të përshkallëzimit të konfliktit në Lindjen e Mesme. Një avion amerikan u rrëzua dje pasi dyshohet për një përplasje në ajër, ndërsa një ushtar francez u vra pas një sulmi me dron ndaj një baze ajrore.