Skemat e investimeve në bujqësi – Mbi 40 fermerë marrin ndihmë teknike në Gjirokastër

Drejtoria Rajonale e Bujqësisë në Gjirokastër po vijon ofrimin e ndihmës teknike për fermerët e zonës, në kuadër të skemave mbështetëse për investimet në sektorin bujqësor.

Deri më tani, mbi 40 fermerë kanë përfituar asistencë për plotësimin e dokumentacionit të nevojshëm.

“Kanë ardhur më shumë se 70 fermerë, por ata që nuk i plotësojnë dot kriteret brenda kësaj periudhe, u kemi thënë: përgatituni për thirrjet e tjera. Një pjesë nuk i plotëson fare kriteret për të aplikuar. Ndërsa ata që i kanë mundësitë, ne mundohemi t’i asistojmë që deri më datë 30 shtator ata të plotësojnë dosjen dhe ta dorëzojnë,” specialisti i Bujqësisë, Balil Bineri

Ndërkohë, specialisti i Bujqësisë, Balil Bineri u bëri thirrje të gjithë fermerëve dhe blegtorëve të zonës që të mos e shtyjnë në kohë aplikimin, por të dorëzojnë dokumentacionin brenda afateve të përcaktuara nga skemat e mbështetjes.

“Është plotësisht e mundur që ta dorëzojnë. Të gjithë ata që na vijnë neve, u vendosim periudha shumë të ngushta, pastaj ata kanë edhe punët e tjera dhe nuk i përgjigjen afateve tona. Janë të rrallë ata që i përgjigjen,” tha ai.

Këto investime janë jetike për zhvillimin e sektorit bujqësor në qarkun e Gjirokastrës, duke u ardhur në ndihmë fermerëve për rritjen e produktivitetit dhe përmirësimin e infrastrukturës bujqësore.

Gazetare: Leonida Koçiu

/rtsh.al/