Subvencionet bujqësore, mbi 3800 aplikime. Interes i lartë, por kriteret përjashtojnë shumë fermerë

Mbi 3800 fermerë nga qarqet Fier, Vlorë dhe Gjirokastër kanë aplikuar në 10 ditët e para për Skemën Mbështetëse të Bujqësisë 2026. Vetëm në Fier numërohen rreth 1700 aplikime. Mbështetja për sipërfaqen dhe skema e naftës mbeten më të kërkuarat, ndërsa kushti i minimumit 3 hektarë tokë ka lënë jashtë një pjesë të fermerëve me prona të copëzuara.

“Erdha për aplikimin e naftës dhe më thanë se duhen 3 ha tokë”, u shpreh një fermer.

“Unë po aplikoj për skemën e ullishtës dhe nuk i plotësoj 3 ha”, tha një fermer tjetër.                  

Sistemi online ka funksionuar normalisht dhe aplikimet regjistrohen në kohë reale. Për herë të parë, skema përfshin mbështetje për mbarështimin e dosave dhe për të rinjtë nën 30 vjeç, deri në 1 milion lekë, si edhe investime për mekanikë bujqësore dhe stane.

“Interesi më i madh është ai për sipërfaqe e cila në një farë mënyre ka zëvendësuar skemën e naftës, më pas janë aplikimet për gjedhin, për të imtat, bleta”, tha Ferdinant Shani, Drejtor, AREB Lushnjë.

Pas mbylljes së aplikimeve, dosjet do të verifikohen në dokumentacion dhe në terren. Skema qëndron e hapur deri në fund të qershorit dhe përfshin 9 masa direkte dhe 3 masa investimi për zhvillimin e fermave bujqësore.

/rtsh.al/