Tabaku: Raporti i OSBE-ODIHR i rrëzon zgjedhjet

TIRANË, 12 maj/ATSH/ Kandidatja për deputete e koalicionit Partia Demokratike-Aleanca për Shqipërinë Madhështore në qarkun e Tiranës, Jorida Tabaku deklaroi sot se, raporti paraprak i OSBE-ODIHR rrëzon zgjedhjet.

Në një intervistë televizive, Tabaku u shpreh se, “këto janë zgjedhjet e para me të cilat Shqipëria përballet pasi janë hapur negociatat”.

“Në momentin kur të hapen negociata dhe t’i ke një grup kapitujsh të parë që duhet të plotësosh detyrimet, ku zgjedhjet janë gurë-themeli i parë, atëherë ose duhet të kesh vullnetin politik për të bërë zgjedhjet, dhe për të pasur avancim në procesin e integrimit, ose thuaj se unë do të mbetem përjetë këtu dhe për mua ka më shumë rëndësi pushteti sesa çdo lloj procesi tjetër, edhe demokracia në vetvete”, tha ajo.

Tabaku theksoi më tej se, “raporti i OSBE-ODIHR, i rrëzon zgjedhjet, është një raport i cili ngre shqetësime të cilat janë reale”.

“Ajo që ndodhi në Vorë dje, me intimidimin e votuesve, grupet kriminale të përfshira, ka bërë që nga ai moment në orën 12 e deri në fund të ditës, njerëzit të mos shkonin të votonin dhe kryesisht ishin përfaqësues të opozitës dekurajoheshin”, theksoi Tabaku.

“Ajo që ka ndodhur në Vorë është shembulli se si bëhen zgjedhjet në Shqipëri”, shtoi Tabaku.

Sipas saj, “për OSBE-ODIHR këto nuk janë problematika të reja, këto i paralajmëroi opozita dhe në dëgjesë, i paralajmëroi dhe në takime të ndryshme, kudo ku ka pasur zë opozita”.

“OSBE-ODIHR nuk është polici i zgjedhjeve, ne jemi shtet sovran, menaxhojmë vetë procesin zgjedhor, por duhet të mbajmë vetë dhe përgjegjësitë”, tha Tabaku, e cila shtoi se, “ajo që ka për detyrë OSBE-ODIHR, Parlamenti dhe Komisioni Europian, që në momentin që të cenohen zgjedhjet, në momentin kur cenohet dhe rotacioni, atëherë duhet të merren masat ndaj Shqipërisë. Edhe procesi i integrimit pengohet, edhe procese të tjera që lidhen me demokracinë, që nuk kanë për të ecur më përpara”.

Por, shtoi Tabaku, “kur një shtet plotëson minimumin e detyrimeve të demokracisë dhe kritereve që OSBE-ODIHR ka për vendet anëtare, atëherë për ca flasim, këtu nuk ka më demokraci. Kur nuk kryen dot rotacion me zgjedhje të lira dhe të ndershme e këto i ka në dorë Parlamenti dhe Komisioni Europian, se ne nuk mund të rrimë zgjedhje pas zgjedhje të përsëritura të njëjtat probleme, edhe më të agravuara dhe të mos bëjmë asgjë”.

“Kjo situatë ka qenë një kambanë alarmi edhe për ta’, tha ndër të tjera, Jorida Tabaku.

/a.f/