Valë kërcënimesh me bomba në Evropë, ndërpriten dhjetëra fluturime dhe evakuohen disa media
Një valë kërcënimesh me bomba ka përfshirë disa vende evropiane, duke shkaktuar ndërprerjen dhe devijimin e dhjetëra fluturimeve, si dhe evakuimin e disa institucioneve mediatike. Autoritetet në disa shtete kanë aktivizuar masat e sigurisë, ndërsa kanë nisur hetimet për të zbardhur origjinën e kërcënimeve. Aeroporti i Pragës konfirmoi se nëntë fluturime janë prekur nga kërcënimet me bomba gjatë ditës së premte. Një zëdhënës i aeroportit deklaroi se policia ka marrë masat e nevojshme të sigurisë, ndërsa operacionet aeroportuale vijojnë normalisht.
Në total, të paktën 17 fluturime raportohet se janë ndërprerë gjatë ditës në disa vende të Evropës, megjithëse informacionet për të gjitha rastet mbeten të kufizuara.
Edhe Bullgaria është përballur me kërcënime ndaj fluturimeve drejt Sofjes. Dy avionë, njëri nga aeroporti Stansted i Londrës dhe tjetri nga Brukseli, u ulën në mënyrë të sigurt, pasi autoritetet morën alarmet përkatëse.
Ndërkohë, zyra e kryeministrit francez njoftoi se katër kërcënime të reja me bomba ishin marrë ndaj avionëve që fluturonin mbi territorin francez. Të gjithë avionët u ulën në mënyrë të sigurt, ndërsa njësitë e specializuara kryen kontrollet përkatëse. Autoritetet kanë nisur një hetim për të përcaktuar origjinën e kërcënimeve që kanë prekur disa vende evropiane.
Një tjetër alarm u regjistrua në Portugali, ku një kërcënim me bombë ndaj një fluturimi të Ryanair nga Roma drejt Lisbonës rezultoi të ishte mashtrim. Policia portugeze konfirmoi se alarmi ishte i rremë. Kërcënimi kishte përfshirë gjithashtu fluturimin e kthimit nga Lisbona drejt Romës.
Ndërkohë, një avion i kompanisë Wizz Air, që fluturonte nga Praga drejt Romës, u detyrua të ndryshonte itinerarin dhe të ulej në Venecia pas një kërcënimi me bombë. Sipas agjencisë italiane të lajmeve Ansa, avioni me numër fluturimi W46136 ndryshoi drejtim pranë Ferrarës dhe u ul në mënyrë të sigurt në Venecia.
Kërcënimet nuk janë kufizuar vetëm te transporti ajror. Në Irlandë, disa organizata mediatike u detyruan të ndërpresin transmetimet dhe të evakuojnë stafin pas marrjes së mesazheve kërcënuese me bombë.
Mes institucioneve të prekura ishte edhe transmetuesi publik RTÉ, ku emisioni radiofonik “Today With David McCullagh” u ndërpre përkohësisht dhe transmetimi u zëvendësua me muzikë, ndërsa punonjësit u evakuuan nga ambientet e institucionit në Donnybrook.
Evakuime u kryen gjithashtu në redaksitë e Newstalk Radio, Today FM, Virgin Media dhe Irish Independent. Transmetimi i zakonshëm i Radio One rifilloi në orën 10:13, ndërsa në ambientet e RTÉ-së vijuan kontrollet policore me qen të specializuar. Kryeministri irlandez, Michael Martin, deklaroi se kërcënime të tilla duhet të merren seriozisht dhe se policia dhe forcat e mbrojtjes do të punojnë për identifikimin e përgjegjësve.
“Kjo tregon se sa relativisht e thjeshtë mund të jetë të shkaktosh përçarje dhe të minosh funksionimin normal të shoqërisë”, u shpreh Martin.
/rtsh.al/
Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.