Van Horn takon Brahon dhe Ketën: Mbështetje SPAK në luftën kundër krimit të organizuar dhe trafikut të narkotikëve

TIRANË, 8 janar /ATSH/ E Ngarkuara me Punë në Shtetet e Bashkuara të Amerikës, Nancy VanHorn zhvilloi sot një takim me kryeprokurorin e Posaçëm të SPAK, Klodjan Braho dhe kreun e BKH, Joni Keta.

Ambasada e SHBA bëri të ditur se Van Horn përgëzoi kryeprokurorin e Posaçëm të SPAK Klodjan Braho, dhe kreun e BKH, Joni Keta për rolet e tyre të reja drejtuese, duke ritheksuar mbështetjen e Shteteve të Bashkuara për përpjekjet e SPAK në luftën kundër krimit të organizuar dhe trafikut të narkotikëve.

Ambasada amerikane në Tiranë citoi Sekretarin Rubio sipas të cilit “ne do të përballemi me kartelet e drogës kudo që ndodhen dhe kudo që veprojnë kundër interesave të Shteteve të Bashkuara. Detyrimi kryesor i presidentit është të sigurojë interesin kombëtar dhe sigurinë kombëtare të popullit tonë”.

Ambasada nënvizon se SHBA dhe Shqipëria së bashku qëndrojnë të bashkuar në luftën kundër krimit ndërkombëtar.

/gj.m/j.p/