100 milionë euro për qendrën dhe periferinë e Tiranës

Kryebashkiaku Basha inspektoi punën në bllokun 46 në Njësinë Bashkiake nr. 9

Afro 100 milione euro per qendren dhe periferine e Tiranes. 80 blloqe te tjera banimi pritet te rikonstruktohen. 75% do te financohen nga qeveria dhe 25% nga bashkia. Lajmin e mire kryebashkiaku Lulzim Basha e dha ndersa inspektoi punen e bere ne bllokun e banimit 46 ne minibashkine numer 9. “Kjo është një stekë shumë e lartë, por ashtu siç realizuam këtë projekt brenda një kohe rekord, ashtu do e realizojmë edhe atë projekt, për gjithë Tiranën, për një Tiranë moderne e evropiane që fillon nga pragu i derës së qytetarit dhe për këtë jam i sigurt se qytetarët e Tiranës, do të na mbështesin pa dallim, për besimin e ndërsjellë dhe bashkëpunimin mes tyre, Bashkisë e qeverisë, pasi këto janë veprat me të cilat ne flasim”.
Në këtë sipërfaqe prej 2.4 ha jane investuar 47.7 milion lekë për të rehabilituar kanalizimet, krijuar ambiente çlodhëse për të gjitha grup-moshat, 65 vende parkimi dhe 29 vendqëndrime për biçikletat. “Po të shikoni cilësinë e punimeve dhe mënyrën se si duket kjo lagje tani, pas këtij investimi, do të kuptoni se sa i nevojshëm ka qenë ky investim për banorët e kësaj zone dhe çfarë lehtësirash e mundësish krijon, në përmirësimin e jetës së tyre të përditshme, që nga aksesi tek lojërat poshtë pallatit, pa qenë e nevojshme që gjyshet e gjyshërit t’i marrin e t’i çojnë në rrugë të tjera e deri tek përmirësimi i cilësisë së ambienteve, sapo dalin nga shtëpitë e tyre.
Ky investim ka një impakt tërësor, jo vetëm tek cilësia e jetës dhe tek vlera e pronës por në tërësi tek modeli i qytetërimit dhe marrëdhëniet e njerëzve me njeri-tjetrin, brenda familjes, me komunitetin, si rezultat i një investimi”.
Për t’i dhënë të njëjtën cilësi jete edhe banorëve në minibashkinë numër katër, Bashkia e Tiranës ka nisur punën në bllokun e banimit në zonën përballë Shkollës së Bashkuar.
“Bashkia e Tiranës do të bëjë rikualifikimin total të zonës, ndërtimin dhe rindërtimin e gjithë rrugëve dhe rrugicave, trotuareve, pas rinovimit të infrastrukturës nëntokësore sipas nevojës apo ndërtimit nga e para, qofshin këto kanalizime të ujërave të zeza, të shiut, ujësjellësit, sipas nevojës, gjelbërimin, ndriçimin, një terren sportiv, 8 terrene të tjera çlodhjeje për të moshuar e fëmijë, duke përfshirë edhe lojëra për fëmijë, me një gjelbërim masiv jo vetëm të shtrirë në krah të rrugës por edhe me parqe, mini parqe, me sipërfaqe të cilat variojnë nga 300 deri në 1000 metra katrore”.
Kreu i Bashkisë Lulzim Basha u ka bërë të ditur banorëve, se një fond prej 20 milionë eurosh do të investohet brenda një viti, në njësinë bashkiake nr.4