22 vjeçari: Unë e vrava Gaddafin (Video)

Sanad al-Sadek al-Ureibi, 22 vjeçari që është pjesëtar i kryengritësve në Libi thekson se ai është vrasësi i vërtetë i ish-udhëheqësit libian Moammar Gaddafi.

Al-Ureibi publikoi në internet një video-xhirim në të cilin thotë se ai kishte kapur Gaddafin dhe e ka goditur me dy plumba në kokë.

“I kam shkrepur dy plumba, por ai nuk ndërroi jetë menjëherë. Shkoi gjysmë ore kur ai dha shpirt”, deklaron al-Ureibi, i cili kishte braktisur brigadën e tij në Bengazi dhe i ishte bashkëngjitur forcave kryengritëse në Misrata, të cilët kishin ndërmarrë sulmin për rrethimin e Sirtës.

Por, autoritetet e Qeverisë së përkohshme akoma mbajnë qëndrimin se Gaddafi ishte goditur me një plumb gjatë shkëmbimit të zjarrit midis forcave përkrahëse të tij dhe forcave të kryengritësve.

Al-Ureibi në kamera thekson triumfin derisa disa persona të tjerë i urojnë aktin e bërë. Ata në kamera tregojnë një unazë ari dhe xhaketë, për të cilën pohojnë se i ka takuar Gaddafit. Në unazë duket emri i gravuar i gruas së ish-diktatorit, Safije, si dhe viti i martesës së tyre 1970.

Kryengritësi i ri theksoi se Gaddafi u kap në një rrugë që ishte i shoqëruar me disa fëmijë dhe vajza. “Ai mbante një kapelë dhe ne e njohëm nga flokët dhe më pas kuptuam se ishte ai”, pohon al-Ureibi.

Siç shpjegon ai më tej, Gaddafin e ka neutralizuar duke i`a marrë pistoletën dhe e ka kapur më pas për duar.

“E godita me shuplakë, dhe ai mu përgjigje se unë jam djalë i tij. Atëherë e kam kapur për flokë dhe e kam shtrirë për tokë”, theksoi kryengritësi i ri, i cili pohon më tej se kishte dëshiruar që Gaddafin ta dërgonte në Bengazi.

Sipas tij, në zënkën me bashkëluftëtarët e tij nga Misrata, të cilët kishin dëshiruar që Gaddafi të mbetej tek ta, al-Ureibi i ka shkrepur dy plumba në kokë ish-diktatorit dhe më pas pistoleta e artë i është marrë nga dora dhe është larguar me forcë nga vendi i ngjarjes. (INA)