Abuzime me lejet e ndërtimit, KLSH: Bashkia Fier ka vjedhur miliona lekë
KLSH konstaton shkelje në Bashkinë e Fierit, kallëzim penal për dy zyrtarë
Bashkia e Fierit ka rënë në rrejtën e Kontrollit të Lartë të shtetit i cili në auditin e tij të fundit konstaton se zyrtarë të lartë të kësaj bashkie kanë abuzuar me detyrën duke vjedhur miliona lekë. Nisur nga këto shkelje KLSH ka dërguar për kallëzim penal drejtorin e Drejtorisë së Përgjithshme të Zbatimit të Legjislacionit dhe ish-drejtorin e Drejtorisë së Përgjithshme të Urbanistikës në Bashkinë Fier, pasi ka konstatuar shkelje ligjore në lidhje me prokurimet me fondet publike.
Raporti
Përmes një deklarate të shpërndarë për mediat, KLSH bën të ditur se krahas punës pozitive në Bashkinë e Fierit, janë konstatuar shkelje ligjore në lidhje me prokurimet me fondet publike kryesisht në zbatimin e kontratave, dhënien e lejeve të ndërtimit dhe llogaritjen e arkëtimin e pagesave për taksën e ndikimit në infrastrukture dhe taksën 1 për qind të urbanistikës, që duhet të paguajnë subjektet e ndryshme të ndërtimit që kanë ndërtuar objekte në territorin e kësaj bashkie. Dëmi ekonomik llogaritet në vlerën 63,630,534 lekë.
Kallëzimi penal
“Për të gjitha shkeljet e konstatuara, KLSH ka bërë kallëzim penal në prokurorinë e rrethit Gjyqësor Fier për: M.G., në cilësinë e ish- drejtorit të Drejtorisë së Përgjithshme të Urbanistikës dhe të ish-sekretarit të KRRT-së të Bashkisë Fier, për mos llogaritjen e për pasojë mos arkëtimin për vitin 2011 të taksës 1 % të vlerës së preventivit, përcaktuar në nenin 51 të ligjit nr. 8405, datë 17.09.1998 Për Urbanistikën, që arrin në shumën prej 61.050.251 lekë dhe që përbën dëm ekonomik dhe për shkelje të tjera. Kallëzim penal është bërë po ashtu edhe për L.Ç, drejtor i Drejtorisë së Përgjithshme të Zbatimit Legjislacionit për hartimin e Akt-marrëveshjes me nr. 2178/1 datë 04.01.2012 Për shtyrjen e afatit të pagesës së ndikimit në infrastrukturë të pa bazuar në ligjet në fuqi, duke sjellë të ardhura të munguara për bashkinë Fier në një vlerë prej 38.146.594 lekë.”- thuhet në deklaratën e KLSH-së.
Shkeljet
KLSH ka ushtruar auditim në Bashkinë Fier për periudhën 01.01.2011 deri 31.12.2012. KLSH ka konstatuar, krahas punës pozitive, shkelje ligjore në lidhje me prokurimet me fondet publike kryesisht në zbatimin e kontratave, dhënien e lejeve të ndërtimit dhe llogaritjen e arkëtimin e pagesave për taksën e ndikimit në infrastrukture dhe taksën 1 për qind të urbanistikës, që duhet të paguajnë subjektet e ndryshme të ndërtimit që kanë ndërtuar objekte në territorin e kësaj bashkie, me një dëm ekonomik në vlerën 63,630,534 lekë. Ndër shkeljet më kryesore, përmendim:
1) Bashkia nuk ka parashikuar në vendimin për taksat dhe tarifat vendore për vitin 2011, pagesën e 1% të vlerës së preventivit, si taksë e ndikimit në infrastrukturë e cila shkon për financimin e studimeve urbanistike të pushtetit vendor. Në total, vlera e taksës së 1% arrin në 61.050.251 lekë, e cila është e pa llogaritur në formularin e përllogaritjes së taksës së ndikimit në infrastrukturë sipas ligjit.
2) Në 8 raste, Bashkia ka pajisur me leje ndërtimi, pa shlyer më parë taksën e ndikimit në infrastrukturë, në vlerën 38.146.594 lekë, si rrjedhojë e një kontrate të pa mbështetur në ligj, nënshkruar midis Bashkisë Fier dhe subjekteve private të ndërtimit për pagesën me këste të kësaj takse, me pasojë dëm ekonomik ndaj Shtetit.
3) Nga Inspektoriati Ndërtimor Urbanistik i Bashkisë janë marrë 33 vendime pezullimi për ndërtimet pa leje, ndërkohë ndaj personave kundërvajtës nuk janë vendosur masa administrative me gjobë në shumën 2 000 000 deri 5 000 000 lekë, siç përcaktohej në nenin 81 të ligjit nr. 8405, datë 17.09.1998 Për Urbanistikën, i ndryshuar, pra me një efekt negativ financiar me vlerë 66,000,000 lekë, si dhe nuk janë shoqëruar me vendime prishje objekti, në kundërshtim me VKM nr. 862, datë 5.12.2007 Për unifikimin e procedurave të kontrollit të territorit nga Inspektorati ndërtimor e urbanistik kombëtar e ai vendor.
4) Mos zbatimin e planit te përgjithshëm rregullues në dhënien e lejeve të ndërtimit, lidhur me numrin e kateve të miratuara në vendimet përkatëse. Është vepruar në kundërshtim me kërkesat e ligjit nr.8405, datë 17.09.1998 Për Urbanistikën, i ndryshuar, duke i kthyer hapësirat sportive në sheshe ndërtimi.
5) Pagesa të kundërligjshme për paga të personelit në vlerën 1,780,000 lekë, duke miratuar në strukturën e këtij institucioni 7 Drejtorë të Përgjithshëm, në vend të Drejtorë Drejtorie, veprim ky në kundërshtim me VKM nr. 555, datë 11.08.2011, i ndryshuar, nga e cila kanë përfituar padrejtësisht pagesën 9 drejtues.
6) Gjendja e larte debitore për 204 subjekte në vlerën 7,801,471 lekë, nga të cilat 129 subjekte të biznesit te vogël në vlerën 1,982,891 lekë dhe 63 subjekte të biznesit te madh në vlerën 5,818,580 lekë.
7) Nga Drejtoria Juridike e Bashkisë, nuk janë zbatuar e ndjekur hapat ligjorë për kërkimin e arkëtimit të detyrimeve në vlerën 52,793,346 lekë, duke mos zbatuar shumicën e rekomandimeve për shpërblim dëmi, të dërguara nga KLSH me shkresën nr. 585/9, date 26/09/2011 dhe te verifikuara me akt-verifikimin e datës 13/01/2012.- bën të ditur KLSH-ja.
Rekomandimet
Për shkeljet dhe mangësitë e konstatuara, KLSH ka rekomanduar 47 masa organizative, 8 masa shpërblim dëmi në vlerën 63,630,534 lekë dhe 29 masa disiplinore për personat shkaktarë-përgjegjës. Ndër të tjera, KLSH ka rekomanduar bërjen e ndryshimeve në kontratën e shërbimit të parkimit me pagesë nr. 1357/2, date 27/12/2011, mes Bashkisë Fier dhe subjektit sipërmarrës, lidhur me afatin e kohëzgjatjes se kontratës nga 20 vjet në 5 vjet, në përputhje me udhëzimin e Ministrisë se Punëve Publike, Transportit dhe Telekomunikacionit, nr.7, date 10/06/2008. Gjithashtu, KLSH ka rekomanduar që të kryhet testimi i realizimit të të ardhurave të këtij shërbimi për secilën rrugë dhe pas kryerjes së tij, të shqyrtohet mundësia e ndryshimit të nenit III, pika 3 Marrëdhëniet Financiare mes palëve të kësaj kontrate, si dhe dokumentimi ligjor i këtij aktiviteti.