Ademi kandidon për një post drejtues në Federatën Botërore të Peshëngritjes

Peshëngritja është një nga sportet e pakta që vazhdon ta mbajë Shqipërinë në nivelet më të larta të kompeticioneve ndërkombëtare, ku ndër të tjera nuk kanë munguar medaljet e shumta. Por tashmë duket se ka ardhur momenti që vendi ynë të përfaqësohet për herë të parë me një drejtues në një nga organizmat e larta sportive botërore, siç është Federata Ndërkombëtare e Peshëngritjes. Ky është një nga lajmet e mira që ka mbërritur në fund në lidhje me sportin peshëngritjes. Presidenti i Federatës Shqiptare të Peshëngritjes, Esat Ademi, mësohet se do të kandidojë për të marrë një nga postet: ose atë të zv/presidentit të Federatës Botërore të Peshëngritjes, ose atë të anëtarit të Komitetit Ekzekutiv të këtij institucioni ndërkombëtar sportiv. Kjo kandidaturë është zyrtarizuar dje përpara gazetarëve nga sekretari i FSHP-së, Ilir Kraja. "Këto kandidime janë një tjetër tregues i reputacionit dhe prestigjit, që gëzon Federata Shqiptare e Peshëngritjes në arenën ndërkombëtare, si dhe konfirmon autoritetin e presidentit Ademi në familjen botërore të peshëngritjes". Presidenti FSHP-së, Esat Ademi, është njëkohësisht edhe presidenti aktual i Konfederatës Mesdhetare të Peshëngritjes dhe anëtar i Komitetit Ekzekutiv në Federatën Evropiane. Kongresi i Federatës Ndërkombëtare të Peshëngritjes do të mbahet në Madrid më 31 mars. Vetëm pak kohë më parë, në muajin dhjetor 2008, Ademi ishte në garë për postin e presidentit të Komitetit Olimpik Kombëtar Shqiptar, ku rival të vetëm kishte Fidel Yllin. Por Asambleja Zgjedhore e KOKSH-it dështoi për shkak të dhunës që shpërtheu gjatë votimit. Kjo i shtyu drejtuesit të pezullonin punimet e Asamblesë deri në një kohë të pacaktuar. Data e zgjedhje tashmë pritet të përcaktohet në bashkëpunim me drejtuesit e Komitetit Olimpik Ndërkombëtar (CIO).