Allegri optimist për Ligën e Kampionëve

Trajneri i Milanit, Massimiliano Allegri, thotë se ai është i kënaqur se ekipi i tij do të përballet me Barcelonën në fazën e grupeve të Ligës së Kampionëve, edhe pse ai pranon se kjo nuk do të jetë e lehtë.

Kampionët e Italisë u caktuan në grupin H së bashku me Barcelonën, Bate Borisov dhe Viktoria Plzen, ndërsa në ndeshjen e parë që zhvillohet më 13 shtator do të duhet të udhëtojnë në Camp Nou.

“Ne jemi caktuar përballë ekipit më të fuqishëm, por në grupin tonë ne kemi dy ekipe të tjera që mund t`i tejkalojmë. Mendoj se raundi i ardhshëm është i arritshëm për ne”.

“Me Barcelonën është një sfidë e madhe, besoj se ne duhet të përgatisim veten të jemi në gjendje të luajmë më mirë. Mendoj se ndeshja jep një stimulim dhe motivim të madh. Ne përfundimisht jemi në kushtet më të mira për t`u përballur me këtë”, ka thënë Allegri.

Ndeshja e kthimit në San Siro do të zhvillohet në raundin e pestë, që është parashikuar të zhvillohet më 23 nëntor.