Arrat e shegat nuk mbillen në Sheraton
Çdo mëngjes, rreth orës 9 e gjysëm, nëse kontrolloni kanalet informative, do të shikoni të njëjtën fytyrë. Kryeministri Sali Berisha përpara një mikrofoni në një nga sallat e hoteleve luksoze të Tiranës. Një ditë flet për ujin, një ditë tjetër për teknologjinë dixhitale, sot po fliste për arrorët e shegat. Televizionet fiksojnë kameran dhe për minuta e minuta të tëra Berisha flet. Thotë të njëjtat gjëra si në mbledhjen e grupit parlamentar, si në mbledhjen e qeverisë, si në takimet në Librazhd. Vetëm se në këtë rast harxhohen mijëra euro për të prenotuar salla luksoze për të dëgjuar fshatari i shkretë, që mezi nxjerr bukën e gojës. Ndërkohë Shqipëria vazhdon të importojë thuajse gjithçka konsumon, në shifra të frikshme.
Një krahasim i shifrave zyrtare të Ministrisë së Bujqësisë nxjerr në pah hendekun e tmerrshëm. Kështu, në vitin 2010 Shqipëria ka importuar 41 500 ton miell. Pra, pjesa më e madhe e kërkesës vendase për miell plotësohet nga importi. Vlen për tu theksuar shifra tejet e ulët e miellit që Shqipëria eksporton, vetëm 11 ton në vit.
Për sa i përket vajit, e gjithë sasia që konsumohet vjen nga importi. Gjatë 2010, Shqipëria ka importuar 44 200 ton vaj vegjetal duke i paguar vendeve të tilla si Ukraina dhe Maqedonia që janë eksportuesit më të mëdhenj për vendin, 4.2 miliardë lekë.
Për sa i parket qumështit, raporti prodhim vendas/import është një me tetë. Sipas MBUMK-së, Shqipëria prodhon 1 070 ton qumësht në vit, ndërsa importon rreth 8 320 ton, me vlerë 890 milionë lekë. Rreth 30 % e qumështit të prodhuar, konsumohet nga vetë bujqit, 51 për qind shitet dhe 19 për qind përpunohet në fermë duke prodhuar qumështin e paketuar që blihet nëpër markete.
PS: Pas këtij takimi i hipën sërish makinës së blinduar, vesh jelekun e niset për në Librazhd. Siç tregojnë pamjet e ofruara nga Fiks Fare, ai ka qenë katër herë për të përuruar rrugën Librazhd- Fushë Studen dhe sërish ajo nuk ka mbaruar. Ka qenë në vitin 2008, 2009, 2010 ishte dhe tani në vitin 2011, vetëm pak ditë më parë.