Arratia e Elezajt, prokuroria veçon çështjen

Superhetimi i deritanishëm i prokurorisë për kontrabandën e naftës virxhin është konsideruar ende i paplotë, pasi nevojiten ende një sërë verifikimesh. Çështja më e fundit që është përfshirë në këtë dosje është arratisja e bosit të “Euroil”-it, Hajri Elezaj. Menjëherë pas ndryshimit të masës së sigurisë nga Shkalla e Parë, Elezaj është larguar nga banesa e tij, edhe pse sipas vendimit të gjykatës duhej të ruhej nga policë. Ky fakt është konstatuar vetëm pas vendimit të Gjykatës së Apelit, e cila e rikthehu atë në qeli, duke rrëzuar kështu shkaqet shëndetësore si arsye e përdorur nga Shkalla e Parë për ndryshimin e masës së sigurisë. Menjëherë pas arratisjes, prokuroria njoftoi nisjen e një hetimi ku përfshihen strukturat e ngarkuara për ruajtjen e tij, si dhe ekipi i mjekëve që hartoi raportin mjeko-ligjor, sipas të cilit qëndrimi i mëtejshëm në qeli mund t’i rrezikonte jetën të arrestuarit Hajri Elezaj. Ky hetim ende nuk ka përfunduar, çka mund të bëjë që prokuroria të veçojë çështjen.