Athina paralizohet nga greva e transportit

Greva e punonjësve të transportit publik ka shkaktuar një rëndim të paparë të trafikut në kryeqytetin e Greqisë.

Punonjësit protestojnë kundër privatizimit dhe uljes së pagave.

Rrugët e Athinës u bllokuan që në mëngjes nga automjetet e shumta private me të cilat qytetarët përpiqeshin të shkonin në vendet e punës.

Greva përkon me diskutimin në parlament të buxhetit të vitit të ardhshëm, që parashikon reduktime të mëdha në fondet për sektorin publik.

Reduktimet konsiderohen të domosdoshme për efektivitetin e reformave që ka ndërmarrë qeveria në përpjekjet e saj për nxjerrjen e vendit nga kriza, njofton korrespondenti i BBC-së në Athinë, Robert Goro.

Agjencitë ndërkombëtare të vlerësimit të efikasitetit të ekonomisë kanë dyshime për mundësinë e daljes së Greqisë nga kriza e borxhit. /bbc/