Avioni Asiana u evakuua me vonesë
Evakuimi i avionit të linjës Asiana, që u rrëzua të shtunën në San Francisko, u vonua për shkak se pilotët fillimisht u thanë pasagjerëve që të qëndronin ulur.
Lajmin e ka bërë të ditur një zyrtare sigurie. Evakuimi filloi 90 sekonda pasi avioni ndaloi në pistë, vetëm pasi një asistent i fluturimit vuri re zjarrin jashtë mjetit, saktësoi zyrtarja.
Ajo e cilësoi mungesën e urdhërit të evakuimit të menjëhershëm si të pazakontë. Nga përplasja dy pasagjerë humbën jetën dhe 180 të tjerë u plagosën.
Në një konferencë për shtyp ditën e mërkurë, kryetarja e Bordit të Sigurisë Kombëtare të Transportit, Deborah Hersman tha se pilotët ishin në kontakt me kontrollorët e trafikut ajror në sekondat pasi avioni u përplas dhe u thanë asistentëve që të mos u urdhëronin pasagjerëve evakuimin.
Duket paksa e pazakontë që ekuipazhi nuk njoftoi urdhërin e evakuimit pasi avioni u përplas. Ne ende nuk e dimë se çfarë po mendonin pilotët, deklaroi zonja Hersman.
Ajo konfirmoi gjithashtu se disa nga komardaret e evakuimit ishin fryrë brenda avionit dhe jo jashtë, duke plagosur një asistente fluturimi dhe duke bllokuar rrugën e daljes së pasagjerëve.
Është zbuluar se piloti që drejtonte avionin po e ulte atë për herë të parë në aeroportin e San Franciskos, ashtu si dhe piloti-instruktor që ishte pranë tij.
