BB: Shqipëria, rritje të borxhit publik dhe ulje të eksporteve

Dalja e Greqisë nga euro do të rrezikonte ekonominë shqiptare. Kryeekonomisti i Bankës Botërore për Shqipërinë, Erjon Luçi, gjatë prezantimit të raportit për Evropën Juglindore gjatë 2012 u shpreh se një largim i vendit helen nga Eurozona do të ndikonte në rritjen e papunësisë dhe në probleme të tjera sociale për vendin. Ndërkohë që sipas Luçit sistemi bankar nuk është i rrezikuar.
 

Rritja ekonomike përgjatë vitit 2012 në vendin tonë parashikohet që të jetë 1.6 përqind, ndërsa për vitin e ardhshëm pritet një ecuri më pozitive e ekonomisë. Perfaqesuesi i Bankës Botërore për Ballkanin Perëndimor, Zeljko Bogetic, u shpreh se cdo gjë do të varet nga ecuria e krizës ekonomike.
 

“Parashikimet per rritjen ekonomike ne Shqiperi pritet të jetë në nivelin 1.6%". Megjithatë, paraqiten pozitive perspektivat për të ardhmen në Shqipëri për vitin 2013, ku rritja ekonomike ne Shqiperi parashikohet në masën 2.5 përqind. Megjithatë, edhe këto parashikime rritjeje modeste supozojnë që kriza e Eurozonës të zgjidhet në mënyrë të rregullt. Nëse kriza do të përkeqësohet, rritja ekonomike në këto vende mund të jetë shumë më e keqe”tha ai.
 

Banka Botërore i ka bërë apel qeverisë shqiptare të bëjë kujdes me borxhin publik. Sipas Përfaqësues së BB në Shqipëri, Ksenia Lvovsky, borxhi në vendin tonë ka tendencë në rritje .
 

“Banka Botërore do të vazhdojë që të kërkoj uljen e borxhit publik dhe të defiçitit. Niveli i borxhit në Shqipëri ka një tendencë rritje, ndërsa rritja ekonomike është 1.6 %, për shkak të ndikimit të krizës globale.Në dy vitet e ardhshme duhet që të ulet nën 3 përqind edhe deficiti. Pikërisht për këtë qeveria duhet të ulë shpenzimet dhe të rrisë të ardhurat nga taksat” u shpreh Ksenia Lvovsky.
 

Gjithashtu sipas raportit kreditimi i ekonomisë mbetet në nivele shumë të ulta, ndërsa konsumi ka pësuar rënie duke mos stimuluar kështu kreditimin.Banka Botërore thekson se eksportet në Shqipëri gjatë këtij viti kanë shënuar rënie.