BEJRUT – Katër viktima, pasi një sulm izraelit rrafshon një ndërtesë banimi në qendër të kryeqytetit

BEJRUT, 23 nëntor /ATSH/ – Një sulm masiv izraelit ka rrafshuar një ndërtesë banimi në qendër të kryeqytetit libanez, Bejrut, sipas BBC.

”Katër persona janë vrarë dhe më shumë se 20 janë plagosur”, sipas Ministrisë së Shëndetësisë të Libanit.

Ndërtesa tetëkatëshe u shkatërrua plotësisht nga pesë raketa në lagjen ”Basta”, me popullsi të dendur të kryeqytetit, sipas agjencisë kombëtare libaneze të lajmeve, NNA.

Sulmi izraelit ndodhi rreth orës 02:00 GMT, me shpërthime që tronditën qytetin.

Ushtria izraelite nuk bëri asnjë koment.

Ekipet e urgjencës kontrolluan vendin në ”Basta”.

Ky sulm është i katërti i Izraelit këtë javë në qendër të Bejrutit.

Të hënën, Hezbollahu, i mbështetur nga Irani, tha se zëdhënësi i tij Mohammed Afif ishte vrarë në një sulm ajror.

Në muajt e fundit, sulmet izraelite kanë vrarë disa anëtarë të lartë të Hezbollahut në Bejrut, duke përfshirë liderin e grupit, Hassan Nasrallah.

Forcat e Mbrojtjes së Izraelit (IDF) filluan një ofensivë të madhe kundër Hezbollahut në shtator, duke kryer sulme ajrore dhe gjithashtu duke dërguar trupa në Libanin jugor.

Armiqësitë u përshkallëzuan pasi Hezbollahu i mbështetur nga Irani lëshoi ​​raketa të përsëritura në Izrael në solidaritet me Hamasin, grupin palestinez që kreu sulmin vdekjeprurës të 7 tetorit 2023 në Izraelin jugor.

Qëllimi i deklaruar i Izraelit në luftën e tij kundër Hezbollahut është të lejojë kthimin e rreth 60 000 banorëve të cilët janë zhvendosur nga komunitetet në Izraelin verior për shkak të sulmeve të grupit.

”Në Liban, konflikti ka vrarë më shumë se 3 500 njerëz dhe ka detyruar më shumë se një milion të largohen nga shtëpitë e tyre”, thonë autoritetet libaneze./  a.jor.