BRUKSEL – Von der Leyen dënon sulmin ndaj kryeministrit sllovak Fico
BRUKSEL, 15 maj /ATSH-DPA/- Presidentja e Komisionit Evropian Ursula von der Leyen dënoi sot sulmin ndaj kryeministrit sllovak Robert Fico.
“Unë dënoj fuqishëm sulmin ‘e poshtër’ ndaj kryeministrit Robert Fico”, shkroi Von der Leyen në X.
“Akte të tilla dhune nuk kanë vend në shoqërinë tonë dhe minojnë demokracinë, të mirën tonë të përbashkët më të çmuar”, shtoi ajo.
“Mendimet e mia janë me kryeministrin Fico dhe familjen e tij”, tha Von der Leyen.
“Kryeministri i Sllovakisë Robert Fico u qëllua disa herë pas një mbledhjeje të qeverisë dhe është në një gjendje të rrezikshme për jetën”, sipas një deklarate të postuar në faqen e tij zyrtare në Facebook.
“Udhëheqësi sllovak u transportua në spitalin në Banska Bystrica”, sipas deklaratës.
Qyteti Handlova, ku ndodhi sulmi, është rreth dy orë me makinë nga kryeqyteti, Bratislavë. Qeveria ishte në qytet për një takim jashtë vendit.
“Disa të shtëna u qëlluan në drejtim të Ficos”, sipas agjencisë së lajmeve TASR.
Shërbimi mjekësor i urgjencës i Sllovakisë tha se kishte dërguar një ambulancë me helikopter në vendngjarje.
Fico fitoi një mandat të tretë si kryeministër sllovak tetorin e kaluar, pasi drejtoi një fushatë që kritikonte mbështetjen perëndimore për Ukrainën.
Përpara zgjedhjeve, Fico nuk e fshehu simpatinë e tij ndaj Kremlinit duke fajësuar “nazistët dhe fashistët ukrainas” për provokimin e Vladimir Putinit për të nisur pushtimin, duke përsëritur narrativën e rreme që presidenti i Rusisë ka përdorur për të justifikuar pushtimin e tij.
Ndërsa ishte në opozitë, Fico u bë një aleat i ngushtë i kryeministrit të Hungarisë Viktor Orban, veçanërisht kur bëhej fjalë për kritikat ndaj Bashkimit Evropian. //a.i/