Balla: Hapja e kutive nuk bie ndesh me Kushtetutën

Tiranë, 7 Shkurt NOA Partia Socialiste
lëshoi edhe një herë akuzë sot ndaj kryeministrit se i është kundërvënë plot 20
herë Gjykatës Kushtetuese, duke vijuar deklaratën më herët të kësaj partie që
evidentonte 18 raste abuzive.

Taulant Balla, deputet i PS, duke pasur si qëllim
të ndalet në hetimin e zgjedhjeve, tha sot në një dalje për mediat se 20
vendime të Gjykatës Kushtetuese kanë gjetur fajtor Sali Berishën si shkelës të
Kushtetutës, ndërkohë që pas çdo vendimi të marrë kundër tij Sali Berisha ka
derdhur vrer kundër këtij institucioni.

Tashmë për të gjithë shqiptarët dhe për
institucionet ndërkombëtare që monitorojnë Shqipërinë është mëse e qartë
domosdoshmëria e hetimit të plotë të zgjedhjeve, - doli në temë Balla.

Sipas tij, hapja e kutive të 28 qershorit
është transparencë kushtetuese dhe ligjore, dhe për asnjë moment kjo
domosdoshmëri nuk bie ndesh as me Kushtetutën, as me ligjet dhe as me vendimet
e Gjykatës Kushtetuese.

Balla vlerësoi se hetimi parlamentar lidhur me
çdo çështje që ka të bëjë me demokracinë, me shtetin e së drejtës, me
ekonominë, me të mirën publike në këtë vend, është një e drejtë kushtetuese e
parlamentit.

Hapja e kutive të votimit është një e drejtë
që buron drejtpërdrejt, jo vetëm nga fuqia kushtetuese e Parlamentit, por edhe
nga fuqia e çdo qytetari në bazë të Kushtetutës së Republikës së Shqipërisë, që
e gëzon të drejtën e patjetërsueshme për informim. theksoi deputeti
socialist.

Më tej Balla foli për bojkotin dhe protestat duke
thënë se janë të vetmit mekanizma demokratikë, në kushtet kur parlamenti është
i uzurpuar për shkak të legjitimitetit të vet politik të munguar.

Për PS, refuzimi i të drejtës për të hetuar
zgjedhjet është në thelb uzurpimi i parlamentit.

e.r/NOA