Ballkani perëndimor, KE nesër propozim për vizat

SHKUP- Komisioni Europian pritet te propozoje mekanizmin e përkohshëm për pezullimin e liberalizimit të vizave për Ballkanin Perëndimor.

Nderkohe, ambasadat e vendeve të Bashkimit Evropian kanë filluar parapërgatitjet për kthim eventual të vizave për qytetarët e Maqedonisë.

Burime diplomatike në Bruksel kanë njoftuar se situata është aq serioze sa që disa vende kanë filluar të bëjnë përgatitje për dërgimin e konsujve kompetentë për vizat.

Të njëjtat burime kanë informuar se në vend të vizave të vjetra, vendet e BE-së tani mund të aplikojë të ashtuquajturat viza biometrike. Këto viza do të kenë formën e kartës së identitetit dhe do të vlejnë për periudhë njëvjeçare, kurse sipas të gjitha gjasave do të jepen falas.

Vizat mund të vendosen për disa vende të rajonit, e jo vetëm për Maqedoninë dhe Serbinë. Vendimi përfundimtar Këshilli i Ministrave të BE-së pritet ta sjellë më 9 qershor.

Si raporton Zhurnali, institucionet në Maqedoni janë mobilizuar pas këtyre paralajmërimeve për kthim të mundshëm të vizave dhe deri tani rreth 500 azilantë potencialë janë penguar të largohen nga Maqedonia.