Barcelona, ekip spektakolar

Ylli i Barcelonës, Lionel Messi ka lavdëruar ekipin katalan që në fundjavë radhiti fitoren e pestë nga po aq duele të sezonit të ri në La Liga.

Edhe pse skuadra nuk ka fituar me lehtësi sikurse që bënte në kohën kur udhëhiqej nga Pep Guardiola, Messi ka lavdëruar punën e trajnerit të ri Tito Vilanova. “Kemi ekip spektakolar. Trajneri është duke bërë punë të mirë dhe këtë e tregojnë edhe rezultatet”, deklaroi argjentinasi për uebfaqen zyrtare të Barcelonës.

“Duhet të vazhdojmë përpara edhe pse e dimë se ka edhe shumë deri në fund. Por, është mirë të fillojmë mbarë dhe të mos humbim pikë në fillim, diçka që gjithmonë ka ndodhur në vitet e kaluara”, shtoi ai.

Messi, sezonin e kaluar e fitoi Këpucën e Artë me 73 gola, por nuk vendos objektiva për edicionin aktual. “Synimi im nuk është të shënojë gjithnjë e më tepër. Gjëja më e rëndësishme është që skuadra të vazhdojë të fitojë. Nëse shënoj, atëherë edhe më mirë por nëse jo, me rëndësi është që ekipi të shënojë”, përfundoi ai.