Baritoni i padëshiruar
Në një emision televiziv gjerman të shtunë u emetua xhirimi i vjetër i një koncerti, në të cilin shihej se si Nikitin, i cili ishte i zhveshur deri në bel, performonte në timpanet enjë rok grupi rus, përderisa në trup i shihej tatuazhi i svastikës naziste, e cila ishte mbuluar pjesërisht me një simbol tjetër.
Ndryshe, shfaqja publike e simboleve naziste në Gjermani paraqet vepër penale.
Organizatorët e festivalit në Bayreuth njoftuan publikun se baritonit rus, Evgeny Nikitin, ia kanë “sqaruar domethënien e simboleve në kontekstin e historisë së Gjermanisë”, dhe se vendimi i këngëtarit operistik është në pajtim të plotë me përjashtimin e çfarëdo forme të ideve naziste, një parim ky që organizatorët i përmbahen me përpikëri.
Festivali aktualisht drejtohet nga dy stër-strëmbesat e kompozitorit të famshëm, Eva Wagner-Pasquier dhe Katharina Wagner.
E kaluara naziste paraqet një çështje të ndjeshme për festivalin e muzikës në Bayrouth, tëp cilin e themeloi kompozitori Richard Wagner, në vitin 1872, dhe në krye të të cilit gjatë periudhës së pushtetit nazist ndodhej gruaja e djalit të kompozitorit, Zigfrida Wagner, e cila e adhuronte Adolf Hitlerin.
Gjatë kohës së udhëheqjes së festivalit nga ana e saj, Hitleri jo vetëm që ndihmoi në financimin e festivalit, por edhe gëzonte të drejtën e ndërhyrjes gjatë marrjes së vendimeve artistike.
Në një kumtesë të shkurtër, që u lëshua nga organizatorët e festivalit,l Nikitin sqaroi se tatuazhet i kishte bërë në kohën kur ishte i ri.
"Ishte ky gabimi më i madh në jetën tim, të cilin do të dëshiroja të mos e kisha bërë kurrë”, thekson Nikitin.
"Vërtet nuk isha i vetëdijshëm për nivelin e konfuzionit dhe dhembjes që mund të shkaktonin këto simbole, veçanërisht në Bayreuth dhe në kontekstin e vetë historisë së festivalit”,sqaron ai tutje.
Në sferën artistike, Richard Wagner konsiderohej si njëri ndër simbolet e regjimit nazist gjerman, ndërkohë që vet fyreri, Adolf Hitler, ishte një adhurues i madh i muzikës së tij, por edhe për shkak se mbështeste teorinë naziste për pastërtinë e racës gjermane. Vetë Hitler i adhuronte kompozimet e tij, për shkak të miteve gjermane që Wagner i përpunonte në veprat e tij muzikore, kështu që ato shërbenin edhe si njëlloj muzike zyrtare e Rajhut të Tretë, gjegjësisht ishte një muzikë që drejtpërsëdrejti aludonte në idetë e nacionalsocializmit gjerman, mbi të cilin u ndërtua ideologjia fashiste.
Festivali i Muzikës në Bayreuth ishte themeluar nga Wagner me qëllim që atje të kultivohej trashëgimia e tij artistike. Gjatë periudhës mes viteve 1933 dhe 1939 Adolf Hitler ishte vizitor i rregullt i këtij festivali.
Vitin e kaluar Orkestra Kamertale i Izraelit vendosi të ndërprite traditën disa dekadëshe për bojkotimin e veprave të kompozitorit gjerman, Richard Wagner, duke u shfaqur në këtë festival. Në vitin 2011, në festivalin në Bayreuth orkestra izraelite interpretoi veprën klasike 20-minutëshe të Wagner “Siegfried Idyll”.
Edicioni i sivjetmë i festivalit hapet këtë të mërkurë, ndërkohë që ende nuk është bërë e ditur se kush do të interpretojë në vend të Nikitin në operën “Holandezi Fluturues”. Organizatorët e festivalit njoftuan se, drejtori i festivalit, Jan Philipp Gloger, beson se “dëmi artistik që iu shkaktua produksionit është tepër i madh”, dhe se ai s’do të mund të riparohet plotësisht para premierës.