Basha, në një konferencë ndërkombëtare për zhvillimin e qëndrueshëm të qyteteve

Kryebashkiaku i Tiranës ka marrë pjesë në konferencën konsultative të Pekinit, lidhur me “Zhvillimin e qëndrueshëm të qyteteve”, ku ka marrë mbështetjen e ekspertëve të qytetit shumëmilionësh, lidhur me projektin e tramvajit. Një ekip i posaçëm ekspertësh do të jetë në Tiranë, të cilët do miratojnë detajet e financimit të projektit për Tramvajin e kryeqytetit

Kryetari i Bashkisë së Tiranës Lulzim Basha po merr pjesë në Forumin “Zhvillimi i  qëndrueshëm i qyteteve, Pekin 2012”, në të cilin marrin pjesë kryetarë bashkish nga 25 qytete të botës si kryebashkiaku i Uashingtonit, Budapestit, Kopenhagenit, Venecias etj. Transformimi i qytetit të Tiranës në pak kohë dhe orientimi i zhvillimit të qëndrueshëm drejt një Tirane të gjelbër, ka qenë arsyeja që zoti Basha u përzgjodh për të përshëndetur në emër të të gjithë kryetarëve të bashkive në pritjen e mirëseardhjes, organizuar nga autoritet e Pekinit. Në sesionin hapës të forumit të orientuar drejt sfidave për një zhvillim të qëndrueshëm, kryetari i Bashkisë së Tiranës Lulzim Basha ka folur për projektin i cili ka nisur të zbatohet në kryeqytetin shqiptar, “Ndërtimi i Tiranës së Gjelbër”. Projektet e Bashkisë së Tiranës, tha zoti Basha, janë orientuar drejt menaxhimit së trafikut, që së bashku me shtimin e gjelbërimit ndikon drejtpërdrejtë në uljen e ndotjes. Kjo u konstatua edhe në sheshin kryesor të kryeqytetit, në Sheshin “Skënderbej”, ku rehabilitimi i tij solli një çlirim të trafikut dhe së bashku me mbjelljen e rreth 800 pemëve ka bërë të mundur uljen me 30% të nivelit të ndotjes. Ndërkohë projekte të tjera të cilat janë në zbatim si  ndërtimi i Unazës së Madhe, zgjerimi i Rrugës së Elbasanit, përmirësimi i qarkullimit tek rreth-rrotullimi i Doganës, ndërtimi i parkimeve nëntokësore, aktualisht ka nisur puna për parkimin nëntokësore tek sheshi “Itali”, parashikohet të ulin ndjeshëm trafikun në kryeqytet. Uljes së trafikut do t’i shërbejë edhe rehabilitimi që t’u bëhet nyjeve të trafikut e cila parashikohet në projektin e  nisur tashmë të Kontrollit të Trafikut Urban. Ky projekt parashikon rehabilitimin e rreth 70 nyjeve të trafikut vendosjen në akset kryesore te 6 pajisje VMS (Tabela Informacioni në rrugë me Informacione të ndryshueshme) dhe instalimin e 23 kamera TVÇ, me vrojtim dite e natë. Gjithçka do të menaxhohet, drejtohet dhe kontrollohet  nga Dhoma e Qendrës Operacionale të Kontrollit. Ndërtimi i linjës së tramit është një tjetër projekt, finalizimi i të cilit, sipas Kryetarit të Bashkisë së Tiranës, do të ketë një impakt të rëndësishëm në reduktimin e ndotjes. Një vëmendje e veçantë, sipas zotit Basha po i kushtohet krijimit të korsive të dedikuara për biçikleta. Një gjë e tillë është mundësuar përgjatë Sheshit “Skënderbej” dhe do të vijë me rrugët e tjera në kryeqytet.
Zoti Basha ka theksuar se Bashkia ka nisur rehabilitimin e Parkut të Liqenit të cilit shumë shpejt do t’i jepet edhe status mbrojtës “Park Rajonal”. Brenda këtij janë parashikuar të mbillen rreth 4 mijë pemë. Ky është vetëm një hap drejt Tiranës së Gjelbër. Përveç Parkut të Liqenit, Bashkia e Tiranës do të krijojë mushkëri të re për qytetin siç është Parku i Paskuqanit, por po kështu ka përfshirë në projektet e saj rikuperimin e Parkut të Farkës. Njëkohësisht do të ketë korridore të reja ekologjike që shtrihen përgjatë Bulevardit të ri dhe krijimit të një zonë rekreative përgjatë Lumit të Tiranës. Zoti Basha theksoi se edhe hartimi i draft-planit urbanistik ka patur si kryefjale Tiranën e gjelbër. Në lagjet e kryeqytetit po shfrytëzohen të gjitha hapësirat e mundshme për të krijuar parqe, sikundër brenda këtij viti në Tiranë do të mbillen 10 mijë pemë.
Kryetari i Bashkisë së Tiranës Luzlim Basha ka zhvilluar takime të veçanta me kryetarin e Bashkisë së Uashingtonit Vincent Gray, të Budapestit Istvan Tarlos, të Kopenhagen  Frank Jensen etj. Në këto takime, zoti Basha ka nënvizuar domosdoshmërinë e shkëmbimit të eksperiencave dhe bashkëpunimit për të arritur një nivel të lartë të shërbimit ndaj qytetarëve dhe përmirësimit të cilësisë së jetës së tyre.
Kryetari i Bashkisë së Tiranës Lulzim Basha zhvilloi një sërë takimesh me autoritet të larta të Pekinit ku në qendër ishte mbështetja për ndërtimin dhe financimin e linjës së tramit. Zoti Basha u prit në takime të veçanta nga kryetari i Bashkisë së Pekinit Guo Jinlong dhe nga sekretari i CPC Liu Ci, ku ka marrë mbështetje për këtë projekt strategjik për Tiranën. Kryetari i Bashkisë së Pekinit i ofroi mundësinë, zotit Basha, që të diskutojë në detaje për projektin e tramit me një grup pune të ngritur për këtë qëllim dhe të drejtuar nga Kryetari i Komitetit të Planifikimit Urban të Pekinit Z. Ye Dahua, e të përbërë nga drejtuesit e departamenteve dhe komisioneve më të rëndësishme në Bashkinë e Pekinit, të cilat kanë planifikuar, projektuar dhe zhvilluar sistemet të tramvajit e metrosë në Pekin. Pas diskutimeve të detajuara u vendos që një përfaqësi e posaçme e planifikimit urban të Pekinit të vizitojë së shpejti Tiranën për të parë në terren ku do të shtrihen linjat e tramit dhe modalitet e tjera për zbatimin e këtij projekti.
Në vijim të vizitës në Pekin, zoti Basha u takua dhe me drejtues të kompanisë shtetërore e sigurimit të eksporteve për kompanitë kineze, Sinosure. Drejtuesit e kësaj kompanie konfirmuan mbështetjen maksimale për kompanitë kineze që zgjedhin të bashkëpunojnë me Shqipërinë.