Bashkia Korçë: Pushteti nuk fitohet me tym e flakë, por me vota të lira

I menjëhershëm ka qënë reagimi i Bashkisë së Korçës, lidhur me deklaratën e Partisë Demokratike këtë të premte. Larisa Katundi, drejtore e marrëdhënieve me publikun në Bashkinë Korçë, në një dalje për mediat, ka thënë se, me deklaratën e sotme dega e Partisë Demokratike në Korçë, legjitimoi aktet e dhunshme të një grushti njerëzish, të cilët dje pasdite, kanë përdhosur imazhin e qytetit me akte dhune, që nuk kanë lidhje me qytetarinë korçare.

Katundi ka shtuar më tej, se pushteti nuk fitohet me tym e flakë në pedonalen e Korçës, por me votat e lira të qytetarëve, të cilët në më shumë se 10 vite i kanë besuar punës, dashurisë për qytetin dhe njerëzve që me përkushtim e kanë bërë dhe vijojnë ta bëjnë këtë.