Bëhet me Vetëvendosjen, AAK-ja do shkarkimin e Qeverisë

Lëvizja Vetëvendosje që ë ka quajtur Aleancën për Ardhmërinë e Kosovës patericë të ekzekutivit, mund të ketë aleat këtë subjekt politik, në përpjekjen për ta rrëzuar qeverinë me mocion.

Partia e Ramush Haradinajt për herë të parë ka thënë se të 12 votat që ka në Kuvend do t’i vinte në dispozicion pro mocionit.

“Në momentin që ne jemi të bindur se qeveria nuk e ka shumicën në Kuvend dhe mocioni i mosbesimit do të dalë i suksesshëm, ne mund ta votojmë atë”, i ka thënë “Kohës Ditore”, Burim Ramadani, sekretar i përgjithshëm në AAK.

“Disa ligje me rëndësi ata i kanë kaluar me vota të veta. Edhe mocionin për rrëzimin e mocionit të reciprocitetit e kanë kaluar me vota të veta. Ne duhet me e pa nëse ata faktikisht apo në praktikë dështojnë t’i kalojnë politikat e veta, atëherë kjo nënkupton që nuk e kanë shumicën. Ne jemi të gatshëm dhe ne po kërkojmë ta ndërrojmë Qeverinë”, ka thënë Ramadani.

“Vetëvendosja” prej kohësh ka ndërmarrë iniciativën për mocion mosbesimi ndaj Qeverisë së drejtuar nga kryeministri Hashim Thaçi. Mirëpo, përpos deputetëve të saj, kurrkush nuk e ka mbështetur me nënshkrime, dhe për pasojë nuk ka mundur të vihet në rend dite. Tash, AAK-ja ka thënë të jetë e gatshme për të dhënë votën e saj, sikur të kishte garanci se ai do të votohej suksesshëm.

Bazuar në Kushtetutë, nëse mbi 60 deputetë votojnë një mocion të mosbesimit për Qeverinë në tërësi, atëherë qeveria konsiderohet në dorëheqje. Po kështu, Kuvendi shpërndahet nga Presidenti, pas votimit të suksesshëm të mosbesimit të Qeverisë./Indeksonline/