Behrami, borxhli ndaj Zvicrës

Për dallim nga Xherdan Shaqiri dhe Granit Xhaka, që u deklaruan hapur se mund ta lënë Zvicrën për Kosovën, Valon Behrami nuk e thotë të njëjtën gjë. Mesfushori kosovar thotë se ndihet borxhli ndaj shtetit Helvetik, i cili i ka dhënë shumë në karrierë. Prandaj, futbollisti i Napolit duket të jetë i vendosur që karrierën ta mbyll me përfaqësuesen zvicerane.

“Unë jam futbollist që i përkas përfaqësueses së Zvicrës, kjo është e qartë. Unë do të jetoj në Zvicër edhe pas karrierës, familja ime është rritur këtu. Jam shqiptar me origjinë, por Zvicrës i takoj. Unë nuk i harroj të mirat e këtij vendi. Do të thosha se zemra ime i përket përgjysmë Zvicrës dhe Shqipërisë. Por, këmbët e mia, trupi dhe forca, gjithmonë do të japin gjithçka për Zvicrën. Nga ky shtet kam përfituar shumë”, deklaroi futbollisti kosovar për uebfaqen tdg.ch.

“Vendimi për të luajtur për Zvicrën ka qenë i thjeshtë: Zvicra e ka ndryshuar jetën time dhe të familjes. Kjo zgjedhje ka qenë logjike”, ka thënë Behrami, i cili e pranon se ndeshja me Shqipërinë do të jetë e veçantë dhe me ndjenja të përziera, por që siguron se në fushë, Shqipërinë do ta konsideron si të gjithë kundërshtarët tjerë.