Beograd, lirohen vrasësit e dyshuar të vëllezërve Bytyçi, SHBA e shqetësuar
Sreten Popoviç dhe Milosh Stojanoviç, akuzoheshin për përfshirje në vrasjen e vëllezërve Ylli, Agron dhe Mehmet Bytyçi, në vitin 1999, trupat e të cilëve janë gjetur në një varrezë masive në Petrovo Selo në lindje të Serbisë, në vitin 2001, raporton Zëri i Amerikës.
Në shtator të vitit 2009 ata u shpallën të pafajshëm, ndërsa në nëntor të vitit 2010, zyra e prokurorisë për krime të luftës në Beograd bëri të ditur se do të rihapet procesi gjyqësor.
Por, ata sot u shpallën serish të pafajshëm, meqenëse sipas trupit gjykues “nuk është vërtetuar se ata kanë ndihmuar vrasjen e vëllezërve Bytyçi".
Të tre vëllezërit ishin pjesëtarë të ish Ushtrisë Çlirimtare të Kosovës, përkatësisht të batalionit Atlantiku i përbërë nga shqiptarë që jetonin në Shtetet e Bashkuara të cilët ju bashkuan luftës në Kosovë.
Në muajin korrik të vitit 1999 ata janë arrestuar në rrethana të panjohura nga forcat serbe në afërsi të vendkalimit kufitar ndërmjet Kosovës dhe Serbisë në Merdarë. Një gjykatë në qytetin e Prokuples i kishte dënuar me nga 15 ditë heqje lirie nën akuzat për siç është thënë, kalim të paligjshëm të kufirit të ish Jugosllavisë. Katër ditë para skadimit të dënimit, ata janë marrë nga burgu dhe janë dërguar në Petrovo Selo ku janë vrarë nga një distancë e afrët. Dy të akuzuarit, sipas prokurorisë, u kishin dorëzuar vëllezërit Bytyçi pjesëtarëve të panjohur të Ministrisë së Punëve të Brendshme të Serbisë, të cilët më pas i kanë vrarë. Trupat janë gjetur në varrezë masive me duar të lidhura me tela.
Procesi kundër dy ish policëve serb kishte filluar më 13 nëntor të vitit 2006, ndërsa zhvillimi i tij ishte përcjellë me shumë reagime të veprimtarëve humanitarë të cilët janë shprehur të pakënaqur me mënyrën e trajtimit të çështjes. Shefja e Fondit për të Drejtën Humanitare me seli në Beograd Natasha Kandiç, e cila përfaqësonte familjen Bytyçi në proces, ishte tërhequr në qershor të vitit 2009 duke tërhequr vërejtjen se “autoritetet po i mbrojnë ata që i urdhëruan vrasjet”.
Familja dhe veprimtarët e Fondit Humanitar kanë shprehur bindjen se në këtë vrasje ishin të përfshirë edhe ish zyrtarë të lartë serb, në mesin e të cilëve ish komandanti i Njësisë së Posaçme Antiterroriste të Serbisë, Goran Radosavleviç, i njohur me nofkën Guri.
Edhe autoritetet amerikane u kishin bërë thirrje autoriteteve serbe që të bëjnë me shumë për të vëne para drejtësisë autorët e vrasjes që edhe 13 vjet pas përfundimit të luftës mbeten të panjohur.
SHBA është shumë e shqetësuar që deri më sot askush nuk është dënuar për vrasjen e vëllezërve Bytyçi, shtetas amerikanë, në vitin 1999 dhe e fton qeverinë serbe që “pa vonesë t’i vërë përgjegjësit para drejtësisë”, i është thënë agjencisë Beta në Ambasadën Amerikane në Beograd pas shfajësimit të të pandehurve në këtë rast.
“Vendimi i sotëm, në gjykimin e përsëritur kundër dy të akuzuarve se kanë dërguar vëllezërit Bytyçi në një kamp në Serbinë Lindore, ku edhe janë vrarë, tregon se ata që kanë ndihmuar dhe kryer këto vrasje, ende nuk janë arrestuar dhe s’janë sjellë para drejtësisë”, ka thënë ambasada amerikane.
“Presim që autoritetet serbe pa vonesa tjera të sjellin para gjyqit të gjithë indivdët të të gjitha niveleve, që janë përgjegjës për këto vdekje. Ky mbetet prioritet i lartë në marrëdhëniet tona dypalëshe”, citohet të ketë thënë Ambasada Amerikane.
Kjo e fundit, ka thënë se vëllezërit Agron, Ylli dhe Mehmet Bytyçi në Serbi janë kapur si robër të luftës, derisa kanë bërë përpjekje, që t’ia shpëtojnë jetën një familjeje rome nga Kosova dhe siç thuhet “janë ekzekutuar” pa gjykimin e duhur.