Beqiraj, hero i Dinamos
Fatos Beqiraj ka shkëlqyer sërish. Sulmuesi kosovar ka kontribuar në fitoren e Dinamo Zagrebit ndaj Varteks Varazdin, në ndeshjen e parë finale të Kupës së Kroacisë.
Futbollisti pejan ka realizuar dy gola për kryeqytetasit, të parin në minutën e 72-të e të dytin në atë të 78-të, për ta ndihmuar Dinamon, e cila fitoi 5:1, duke e bërë një hap përpara drejt trofeut të dytë këtë sezon, pas titullit të kampionit.
Beqiraj beson se kjo ishte njëra prej lojërave më të mira që e shfaqi Dinamo këtë sezon. 23 vjeçari mendon se ekipi i tij ka gjasa të mira që ta fitojë këtë trofe të çmueshëm.
“Kemi një avantazh të madh. Luajtëm mirë, sidomos në pjesën e dytë. Ne ishim nën presion, por në fund shënuam pesë gola. Kjo ishte njëra prej lojërave më të mira që e kemi shfaqur, krahas asaj me Hajdukun dhe ndonjë tjetër aty këtu”, deklaroi sulmuesi kosovar pas ndeshjes.
- “Varazdin kishte ardhur për ta kontrolluar lojën dhe e shfrytëzuam këtë. Trajneri Tot na tha se duhet të luajmë të relaksuar dhe kështu vepruam”, vazhdoi ish futbollisti i Shqiponjës, i Besës dhe i Buduçnostit.
Përfaqësuesi i Malit të Zi ka shënuar 15 gola këtë sezon, 8 në kampionat dhe 7 në Kupë. Ai është bërë idhull i tifozerisë dinamovite duke shfaqur një sezon pozitiv.
Golat tjerë për Dinamon i realizuan Sammir (10’), Tonel (45’) e Badelj (80’). Kurse për Varteks Varazdin golin e nderit e shënoi Skvorc (35’). Trajneri Mario Tot debutoi me fitore bindëse në fanellën e Dinamos. Ndeshja e kthimit më 25 maj do të jetë më shumë formalitet.